Аб перагаворах з ЗША, сустрэчы Пуціна і Трампа, Украіне і сваім пераемніку. Галоўнае з інтэрв'ю Прэзідэнта Беларусі часопісу Time

Фота: belta.by

Прэзідэнт Беларусі Аляксандр Лукашэнка даў інтэрв'ю амерыканскаму часопісу Time. Карэспандэнт выдання Сайман Шустэр сустрэўся з кіраўніком беларускай дзяржавы яшчэ 25 ліпеня, аднак да гэтага часу назва СМІ, а таксама імя інтэрв'юера не раскрываліся. Такая была просьба самога часопіса - каб захаваць інтрыгу і эксклюзіўнасць матэрыялу. І тым цікавей праз два тыдні, чытаючы навіны апошніх дзён, аналізаваць гэту гутарку. Праз некалькі дзён пасля інтэрв'ю Аляксандр Лукашэнка правёў на Валааме нефармальныя перагаворы са сваім расійскім калегам. А Уладзімір Пуцін гэтымі днямі сустрэўся з амерыканскай дэлегацыяй. Ці складуцца гэтыя падзеі і іх водгаласы ў адзін пазл?

Але вернемся да інтэрв'ю. Аляксандр Лукашэнка размаўляў з журналістам каля трох гадзін, у тым ліку ў фармаце off the record, гэта значыць не пад запіс. У інтэрв'ю была закранута вялікая колькасць рэзанансных тэм. Размова выйшла шчырай і змястоўнай. Галоўнае - у нашым матэрыяле.

Як журналіст Time дабіраўся ў Беларусь і што паслужыла прычынай для інтэрв'ю

У самым пачатку інтэрв'ю журналіст Сайман Шустэр расказаў, як дабіраўся ў Мінск і чаму ён прасіў аб сустрэчы менавіта ў гэты час. "Я сапраўды вельмі цаню магчымасць з вамі пагаварыць, асабліва ў такі момант, калі адносіны паміж Злучанымі Штатамі і Беларуссю цікава развіваюцца", - сказаў журналіст, робячы адсылку на нядаўнія візіты ў Мінск амерыканскіх дыпламатаў, што выклікала вялікую цікавасць.

"Вось гэта актывізацыя, калі можна так сказаць, дыялогу паміж адміністрацыяй Трампа і дзяржавай Беларусі", - дадаў ён.

Паводле яго слоў, у рэдакцыі палічылі гэта асабліва цікавым момантам для таго, каб арганізаваць паездку ў Беларусь і інтэрв'ю з яе Прэзідэнтам, а таксама праз свайго карэспандэнта зразумець, што ж тут адбываецца.

Сайман Шустэр падкрэсліў, што яму вельмі імпануе манера Аляксандра Лукашэнкі весці размову - абсалютна адкрыта, шчыра. "Я вельмі цаню ваш падыход у плане таго, што на любыя пытанні гатовы адказаць. Гэта (рабіў. - Заўвага БЕЛТА) далёка не кожны лідар, з якімі я сустракаўся", - звярнуў увагу карэспандэнт.

Аляксандр Лукашэнка на гэта заўважыў, што ў адваротным выпадку (не разлічваючы на шчырую падрабязную размову) не варта было б наогул распачынаць інтэрв'ю, пераадолеўшы для гэтага такую вялікую адлегласць: "Тады навошта з Нью-Ёрка было ў такую далечыню ляцець, ды прытым яшчэ, маладзец, як звычайны чалавек, зведаўшы ўсе складанасці і цяжкасці на граніцы".

"Так, гэта было каларытна... Стаяць пяць гадзін на граніцы", - сказаў журналіст, звярнуўшы ўвагу, што прычынай такога чакання былі не беларускія пагранічнікі.

У сувязі з гэтым зайшла размова аб аднаўленні апошнім часам кантролю на граніцах паміж некаторымі краінамі Еўрасаюза, якія ўваходзяць у Шэнгенскую зону. У якасці прычыны пазначаецца барацьба з нелегальнай міграцыяй, аднак, на думку Прэзідэнта, пры жаданні "прычыну можна знайсці заўсёды".

Аб перагаворах з афіцыйнымі прадстаўнікамі ЗША

Кіраўнік дзяржавы, гаворачы пра ўзаемадзеянне паміж Беларуссю і ЗША, звярнуў увагу, што двухбаковыя адносіны характарызаваліся станоўча і быў час, калі Прэзідэнт гуляў у хакей у адной камандзе з паслом ЗША. Але потым, асабліва ў перыяд спецыяльнай ваеннай аперацыі, якую пачала Расія, адносіны сур'ёзна пагоршыліся.

Тым не менш каналы ўзаемадзеяння паміж краінамі заўсёды прадаўжалі існаваць, у асноўным па лініі спецслужбаў, і таму яны заставаліся па-за публічнай плоскасцю. "Я гэты працэс кантраляваў. Па лініі спецслужбаў былі кантакты. Да гэтага канала я мог падключыць МЗС, калі трэба, урад па нейкіх пытаннях, дапусцім, па санкцыях, - удакладніў Аляксандр Лукашэнка. - Калі мы гаворым пра нейкія далейшыя крокі або выпрацоўку канцэпцыі, каб на паперу пакласці нейкі праект дакумента, я падключаю Міністэрства замежных спраў. Але ў асноўным па лініі спецслужбаў. З вашага боку быў падключаны Крыстафер Сміт (намеснік памочніка дзяржсакратара ЗША. - Заўвага БЕЛТА)".

"Прыстойны чалавек, якога я ЦРУшнікам заўсёды жартам называю, калі ён прыязджае. Ужо разоў пяць мы сустракаліся з ім", - дадаў кіраўнік дзяржавы.

Паводле слоў Прэзідэнта, менавіта гэты чалавек з амерыканскага боку адыграў ключавую ролю ў арганізацыі візітаў у Беларусь афіцыйных прадстаўнікоў ЗША. У тым ліку візіту спецпасланніка Прэзідэнта ЗША па Украіне Кіта Келага для сустрэчы з Аляксандрам Лукашэнкам у чэрвені бягучага года. "Гэта ж пятая ўжо дэлегацыя Злучаных Штатаў Амерыкі, - раскрыў падрабязнасці беларускі лідар. - Дарэчы, яны былі ініцыятарамі. І трэба аддаць належнае, галоўную ролю адыгрываў і цяпер, напэўна, адыгрывае Сміт".

Пры гэтым, зразумела, Прэзідэнт Дональд Трамп у курсе таго, што адбываецца, але, як лічыць Аляксандр Лукашэнка, наўрад ці так ужо моцна паглыблены ў гэту тэму.

Кіраўнік дзяржавы адзначыў, што з ініцыятывай аб арганізацыі сустрэчы ў Мінску выйшаў амерыканскі бок праз беларускіх дыпламатаў, якія працуюць у Нью-Ёрку. "Паступае інфармацыя ад амерыканцаў: хацелі б пагаварыць, абмеркаваць некаторыя праблемы рэгіянальнага характару, глабальныя праблемы, пагаварыць аб гэтым. Хацелі б - калі ласка, мы для гэтага адкрытыя", - расказаў Аляксандр Лукашэнка. Ён звярнуў увагу, што беларускі бок, хоць і быў зацікаўлены ў такім дыялогу, але не настойваў на тым, каб рабіць яго публічным.

"Не мне табе расказваць, што такое Амерыка. Гэта лідар у нашым свеце. Так, аслаблены, так, дзівачыце вы часам незразумела навошта, Прэзідэнт часам заяву раніцай робіць адну, вечарам - другую, а дзейнічае па-іншаму ўжо. Усяго хапае. Але Амерыка ёсць Амерыка, і ў нас не лепшыя адносіны, санкцыі... Што добрага ў санкцыях? - сказаў беларускі лідар. - Мы залежныя ад Амерыкі, і не толькі мы, але і многія дзяржавы з-за існуючай сітуацыі, хоць яна і мяняецца. Таму цэлы комплекс праблем для нас. Прапануюць размову - добра".

Аляксандр Лукашэнка падкрэсліў, што для яго не быў прынцыповым статус удзельнікаў перагавораў ад ЗША. "Гэта маё крэда, гэта мой прынцып: размаўляць трэба з усімі, калі хочаш нармальных адносін. Калі не размаўляеш, то пакрыху рухаешся да вайны. Нам гэта не трэба. Вось была такая прапанова, яны прыехалі, вельмі карэктна паводзілі сябе", - растлумачыў ён.

Кіраўнік дзяржавы падкрэсліў, што Беларусь у пачатку актывізацыі дыялогу з ЗША не ставіла перад сабой мэты дабіцца канкрэтных вынікаў, у тым ліку адмены санкцый, і ў прынцыпе не вельмі верыць у тое, што амерыканцы сур'ёзна настроены нармалізаваць адносіны. Напрыклад, у Беларусі па-ранейшаму няма пасла ЗША. Але, зразумела, зняцце санкцый, калі б яно адбылося, расцэньвалася б беларускім бокам як вялікі крок у нармалізацыі адносін.

Аб перспектывах сустрэчы з Трампам

Прэзідэнта Беларусі спыталі, ці магчыма яго сустрэча з амерыканскім лідарам як адзін з вынікаў дыялогу з прадстаўнікамі ЗША, якія апошнім часам наведвалі Мінск.

Аляксандр Лукашэнка расказаў, што на гэты момант такая сустрэча не стаіць на парадку дня, хоць для Дональда Трампа яна магла б аказацца дастаткова важнай. "Яму было б архікарысна (сустрэцца. - Заўвага БЕЛТА), калі ён шчыры ў сваіх заявах аб унутранай і знешняй палітыцы, - адзначыў Прэзідэнт Беларусі. - Таму што ў адрозненне ад вас усіх, хто вакол яго бегае, я яму адкрыў бы вочы на многія рэчы. У тым ліку амерыкана-расійскія адносіны, па канфлікце ва Украіне асабліва. І, зразумела, аб пазіцыі Беларусі".

Кіраўнік дзяржавы дадаў, што ў цэлым добра ставіцца да Дональда Трампа і публічна выказваўся ў яго падтрымку ў той перыяд, калі на чале ўлады ў ЗША быў Прэзідэнт Байдэн і супраць Трампа была развязана цэлая кампанія. "Я адкрыта крытыкаваў вашу дэмакратыю так званую, вашага Прэзідэнта Байдэна і падтрымліваў Трампа. Гэта было ганебна - тое, што вы рабілі з Трампам да апошніх прэзідэнцкіх выбараў", - звярнуў увагу ён.

Але ў той жа час цяпер Прэзідэнт Беларусі крытычна адзываецца аб дзеяннях і выказваннях амерыканскага лідара ў публічным полі. Яны часта супярэчлівыя або галаслоўныя, а значыць, не ўспрымаюцца сур'ёзна і не выклікаюць даверу. Адзін з апошніх прыкладаў - яго шматлікія заявы ў СМІ аб намеры ЗША ўвесці пошліны для іншых краін. "У вас акрамя пошлін, напэўна, ніякай палітыкі больш няма. І прытым пошліны раніцай адны, вечарам другія. Але перш, чым гаварыць пра пошліны і потым іх адмяняць і дэзавуіраваць свае заявы, прапрацуй гэта. Гэта не так складана", - лічыць Аляксандр Лукашэнка.

На яго думку, адна з прычын такога стану спраў заключаецца ў характары амерыканскага лідара, з-за якога людзі ў яго акружэнні не адважваюцца гаварыць адкрыта або крытычна аб тых ці іншых яго рашэннях, выказваннях. Гэта тэма, у прыватнасці, закраналася ў час візіту ў Мінск прадстаўнікоў ЗША і іх сустрэчы з Прэзідэнтам Беларусі.

Аляксандр Лукашэнка расказаў пра адзін з эпізодаў: "Мы абмяркоўвалі, доўга размаўлялі. Потым я жартам гавару: "Ведаеце, вам не хапае дыктатара аднаго ў Злучаных Штатах Амерыкі". - "У нас сваіх хапае". - Я гавару: "Не, напэўна, не хапае. Я маю на ўвазе мяне. Я вашаму Прэзідэнту сказаў бы многае".

Аб вельмі цесных адносінах з Расіяй і балбатунах у ЕС

У адным з пытанняў журналіст агучыў існуючае меркаванне, што ЗША праз аднаўленне дыялогу з Беларуссю імкнуцца нейкім чынам аддаліць яе ад Расіі. "Ну, гэта нечая мара", - пракаменціраваў Прэзідэнт.

З боку ЗША такое жаданне існавала заўсёды, і аб гэтым гаварыў яшчэ Джордж Сорас, калі ў 1990-я гады прыязджаў у Беларусь і сустракаўся з Аляксандрам Лукашэнкам. "Я гавару: "Джордж, ты мне прабач, па-амерыканску я палітыку праводзіць не буду, гэта я рабіць не буду. Таму, напэўна, гэта наша з вамі апошняя сустрэча". Я даў зразумець, што мы супрацоўнічаць не будзем. І з таго часу я прытрымліваўся гэтай лініі", - расказаў кіраўнік дзяржавы.

Аляксандр Лукашэнка звярнуў увагу, што паміж Беларуссю і Расіяй - цесныя, саюзніцкія адносіны, якія склаліся не толькі гістарычна, але і замацаваны ў шматлікіх дакументах. І Беларусь няўхільна выконвае ўсе свае абавязацельствы. "Таму нейкія заходнія еўрапейцы і іншыя, нават амерыканцы, у нашы адносіны з Расіяй няхай не лезуць. У нас ёсць адносіны ў ваеннай галіне. Вы гэта ведаеце. Пачынаючы ад "Арэшніка", заканчваючы ядзернай зброяй. У нас ёсць адносіны ваенна-тэхнічнага характару, эканамічнага (гэта наш рынак, самы ёмісты рынак для Беларусі - расійскі). Мы адтуль закупляем энерганосьбіты - толькі ў Расіі. І гэтак далей. Нам хто-небудзь гэта замяніць можа? Не. Нават з практычнага пункту гледжання ніхто не можа, не гаворачы пра юрыдычныя нашы пагадненні", - падкрэсліў кіраўнік дзяржавы.

"Расія ўжо ва ўсе свае дакументы ўключыла: "Напад на Беларусь - гэта напад на Расію". Дакладна гэтак і ў нас. Напад на Расію - гэта напад на Беларусь. Таму ў нас вельмі цесныя адносіны. Разарваць іх ніхто не можа, асабліва балбатуны Еўрапейскага саюза", - дадаў ён.

Размова зайшла таксама аб тым, як у Расіі ўспрымаюць аднаўленне беларуска-амерыканскага ўзаемадзеяння на афіцыйным узроўні. У сувязі з гэтым Аляксандр Лукашэнка звярнуў увагу: абмеркаванне ў час перагавораў трэціх асоб і дзяржаў, якія там не прысутнічаюць, выключана ў дыпламатычнай практыцы. Магчыма канцэптуальнае абмеркаванне нейкіх агульных пытанняў, але дамаўляцца за спінай у некага - гэта табу. "Мы не дамаўляемся з амерыканцамі за спінай у Расіі", - падкрэсліў Прэзідэнт.

Аб першым кроку на шляху да спынення агню

У той жа час бываюць сітуацыі, калі амерыканцы, ведаючы пра добрыя асабістыя адносіны двух лідараў, просяць кіраўніка беларускай дзяржавы перадаць якую-небудзь інфармацыю або прапановы Прэзідэнту Расіі. Адзін з нядаўніх прыкладаў, аб якім згадаў Аляксандр Лукашэнка, датычыцца магчымасці ўстанаўлення паветранага перамір'я паміж Расіяй і Украінай. Паводле слоў заходнікаў, Прэзідэнт Пуцін на гэта не згаджаўся.

"Яны мне гавораць: "Вось мы з ім спрабавалі так дамовіцца. Ён не хоча". Я гавару: "Такога не можа быць" (я прыклад прыводжу, там яшчэ пару пытанняў было). Я гавару: "Вось гэта я гатовы абмеркаваць з Уладзімірам Уладзіміравічам - гэта пытанне". Яму тэлефаную і гавару: "Уладзімір Уладзіміравіч, вось такая праблема. Узнімаюць пытанне". Ён мне па-сяброўску так, па-братэрску гаворыць: "Ды ты што?! Ды мы за! Мы не супраць. Але Украіна няхай не наносіць удары са свайго боку", - расказаў падрабязнасці сваёй размовы Аляксандр Лукашэнка. - Я ўсё перадаў (адказ расійскага боку заходнікам. - Заўвага БЕЛТА). Гавару: "Дык вы ж не хочаце". - "Як мы не хочам?" - "Ну вы за Украіну цяпер гаворыце. Дык вы папярэдзьце кіраўніцтва Украіны, каб яны не бамбілі Расію. Расія не будзе па паветры наносіць удары па Украіне".

Кіраўнік дзяржавы лічыць, што паветранае перамір'е стала б добрым першым крокам на шляху да поўнага спынення агню. Але ў гэтым выпадку ніяк нельга сцвярджаць, што Расія супраць і нібыта імкнецца бамбіць мірныя гарады (хоць на Захадзе гэта падаюць менавіта ў такім ключы). "У мяне была размова з Пуціным, калі яны стаялі ў Кіеве фактычна. Я ведаю яго пазіцыю, - расказаў Аляксандр Лукашэнка. - Калі я яму задаў пытанне па тэлефоне: "Уладзімір Уладзіміравіч, вы ў Кіеве, занялі Кіеў, - канец вайне?" Ён гаворыць: "Як занялі?!" Яны ж, гаворыць, схаваліся. Даслоўна: "У дзіцячых садах, у школах сядзяць. Нам што, па дзіцячых садах, па школах біць?" Тады Прэзідэнт Расіі вырашыў адвесці войскі ад украінскай сталіцы, паверыўшы некаторым людзям, якія паабяцалі, што на гэтым канфлікт спыніцца. "Адвёў войскі. Спынілася вайна? Не", - слушна заўважыў Аляксандр Лукашэнка.

Паводле яго слоў, на Захадзе старанна ствараюць вобраз "крыважэрнага" расійскага лідара, хоць гэта абсалютна не так. Робіцца гэта дзеля пэўных мэт, праводзяцца інфармацыйна-псіхалагічныя аперацыі, у якіх дасягнулі поспеху на Захадзе і навучылі гэтым тэхналогіям украінцаў. Адзін з прыкладаў - падзеі ў Бучы. "Там усё не так было, як паказвалі. Гэта была добра спланаваная акцыя, каб паказаць агрэсіўнасць, крыважэрнасць - "забойцы расіяне"... Нічога такога там не было, - звярнуў увагу Аляксандр Лукашэнка. - І мы ведаем, хто гэта рабіў. І мы ведаем нумары аўтамабіляў, на якіх прыехалі арганізатары Бучы. І я пра гэта публічна гаварыў".

"Не трэба тут гаварыць аб тым, што Пуцін бамбіць мірных, - сказаў кіраўнік дзяржавы. - А што, Зяленскі разбіраецца ў тым, куды паляціць беспілотнік і іншае? Яны на нашу тэрыторыю то з аднаго, то з другога боку залятаюць, недзе паўсотні мы ўжо зафіксавалі".

"Гаварыць аб тым, што мірныя гарады, б'е па мірным насельніцтве Расія, а ўкраінцы такія пушыстыя, у белых пальчатках, - гэта несправядліва", - перакананы Прэзідэнт.

Аб настроях у расійскім істэблішменце

Яшчэ адзін аспект, які закранаўся ў інтэрв'ю, гэта пэўная насцярожанасць у некаторай часткі расійскага істэблішменту наконт актывізацыі дыялогу паміж Беларуссю і ЗША. "У Расіі ёсць розныя людзі, як і ў Амерыцы, - сказаў наконт гэтага кіраўнік дзяржавы. - Ёсць людзі, якія вельмі заклапочаны".

Як ні дзіўна, але падставай для крытыкі становіцца палітыка шматвектарнасці, якую праводзіць Беларусь. "Але гэта адна група людзей, хоць на чале гэтай групы сур'ёзны інстытут, - адзначыў Прэзідэнт. - Я з Уладзімірам Уладзіміравічам перагавару на гэту тэму. Гэта адна група людзей. Ёсць там у СМІ журналісты розныя і гэтак далей".

Аляксандр Лукашэнка, адказваючы на пытанне журналіста, заявіў, што не бачыць у існаванні такой думкі і такой групы ніякай небяспекі, у тым ліку ў плане ўплыву на меркаванне расійскага кіраўніцтва. "Непрыемна, вядома, калі ўжо шчыра гаварыць, калі нехта ў Расіі так думае, піша. Ну, розныя людзі ёсць. Але асноўны трэнд - поўная падтрымка нашай пазіцыі і поўная ўзаемадапамога. Нас няма ў чым папракнуць", - заявіў Прэзідэнт.

Паводле яго слоў, з Уладзімірам Пуціным у іх склаліся "абсалютна даверныя і добрыя адносіны", і наўрад ці нейкі сусветны лідар лепш ведае Прэзідэнта Расіі. "Гэта не значыць, што я не маю свайго пункту гледжання. Рызыкну сказаць, што ніхто так шчыра яму не гаворыць у вочы і ўнутры краіны, і з-за меж, як я магу з ім размаўляць", - адзначыў Аляксандр Лукашэнка.

Аб знешняй палітыцы

Кіраўнік дзяржавы адзначыў, што на Захадзе можна пачуць меркаванні аб тым, што Беларусь "акупіравана Крамлём". У сувязі з гэтым Прэзідэнт звярнуў увагу на сітуацыю ў суседніх краінах. У той жа Украіне - багатая, магутная, у тры разы багацейшая за Беларусь, гэта краіна даўно акупіравана Захадам.

"А Польшча кім акупіравана? А краіны Балтыі, якія поўзаюць там нават не ў амерыканцаў. Амерыканцы ўжо, напэўна, пагардліва на іх глядзяць. У еўрапейцаў, у тых самых палякаў поўзаюць. Там са стала крошкі скінулі - яны хапаюць, каб іх падзяўбці, як кураняты. Яны не акупіраваны?" - запытаў беларускі лідар.

"Усе мы ад некага залежым, асабліва сярэднія, малыя дзяржавы. І ўсе мы імкнёмся да кагосьці прыхінуцца, быць у саюзе, каб забяспечыць у тым ліку сваю бяспеку. Гэта называецца палітыка балансавання. Мяне часта папракалі, што я на двух крэслах ледзь ці не хачу ўседзець. Ніколі на двух крэслах не сядзеў", - заявіў Аляксандр Лукашэнка.

Ён падкрэсліў, што Беларусь заўсёды імкнулася развіваць дружалюбныя адносіны са сваімі суседзямі. Бо яны, як часта гаворыць кіраўнік дзяржавы, ад бога, іх не выбіраюць.

"Я з імі павінен мець адносіны. Я і расіянам аб гэтым гавару. І потым, у мяне ж і інтарэсы ёсць нейкія ў гэтых дзяржавах. У тым жа Еўрапейскім саюзе. І нават у далёкай Амерыцы ёсць свае інтарэсы. Перш за ўсё эканамічныя. Дыпламатычнага характару. Што тут дрэннага? Гэта зразумела", - канстатаваў Прэзідэнт.

У той жа час ён звярнуў увагу, што галоўнымі саюзнікамі для Беларусі застаюцца Расія і Кітай. Сярод прыярытэтаў таксама краіны далёкай дугі.

"Гэта ж зразумела. І свет жа мяняецца. Нельга ж вось раз і назаўсёды сесці на тыя драбіны, як гэта было 100 гадоў таму або ў савецкі час, і на іх скакаць. Свет змяніўся, і мы павінны мяняцца. Калі не будзем мяняцца, разатруць, самнуць і знішчаць", - упэўнены беларускі лідар.

Аб апасках Расіі і пачатку СВА

Шэраг пытанняў кіраўніку дзяржавы ў час размовы датычыўся тэмы пачатку спецыяльнай ваеннай аперацыі Расіі ва Украіне і падзей лютага 2022 года, хоць аб гэтым Прэзідэнт выказваўся раней, і не адзін раз. Аляксандр Лукашэнка расказаў, што ў лютым 2022 года на тэрыторыі Беларусі праходзілі сумесныя з Расіяй маштабныя ваенныя вучэнні. "Вучэнні завяршыліся (яны праходзілі на поўдні, на палігонах брэсцкім і баранавіцкім). Пачалі выводзіць (расійскія. - Заўвага БЕЛТА) войскі. Гомель, па поўдні (Беларусі. - Заўвага БЕЛТА). Недзе самалётам, але ў асноўным па чыгунцы. Гэта адразу практычна на граніцы з Украінай. У нейкі момант павярнулі на поўдзень - направа, - адзначыў ён. - І зайшлі ва Украіну ў час гэтага вываду".

"А войскі былі Усходняй акругі - з усходу Расіі. Я гавару: "Чаму войскі Расіі праз Кіеў пайшлі на ўсход Расіі, чаму Пуцін выводзіў іх праз Кіеў у Расію - гэта да Зяленскага пытанне і да Пуціна", - сказаў беларускі лідар.

Кіраўнік дзяржавы растлумачыў, што пры планаванні такіх сур'ёзных ваенных аперацый колькасць праінфармаваных людзей мінімальная, і ён не быў сярод іх. "Калі пачынаецца аперацыя нейкая, гэта ведае некалькі чалавек у Генеральным штабе: калі, якімі сіламі. Так, можа распрацоўвацца план загадзя. І ён распрацоўваецца загадзя. Але момант гэты ведаюць толькі яны, - заўважыў Прэзідэнт. - Ніхто, акрамя некалькіх чалавек, не маглі быць уведзены ў гэтыя планы. Таму я ў плане таго, што мяне не праінфармавалі там і іншае, спакойна да гэтага паставіўся. Тым больш гэта ж не сумесная аперацыя. Калі б генеральныя штабы прапрацоўвалі сумесна нейкую аперацыю - іншая справа".

Аляксандр Лукашэнка звярнуў увагу, што ў лютым 2022 года, яшчэ да пачатку СВА, сур'ёзна абвастрылася сітуацыя ў Данбасе, з-за чаго з боку Расіі нават была арганізавана эвакуацыя грамадзянскага насельніцтва на аўтобусах. І Прэзідэнт Беларусі, знаходзячыся ў гэты час з візітам у Расіі і размаўляючы з Прэзідэнтам Уладзімірам Пуціным, быў у курсе таго, што адбывалася. Як расказаў Прэзідэнт Беларусі, ва Уладзіміра Пуціна тады былі апаскі наконт агрэсіўных дзеянняў Захаду. "Чамусьці ён асцерагаўся, што з Захаду можа быць нанесены ўдар у спіну яму. Ён жа аб гэтым не гаварыў (аб планах пачаць СВА. - Заўвага БЕЛТА). Але гаворыць: вось, калі раптам ва Украіне, Данбас там і іншае, - яны могуць нанесці ўдар у спіну. Я гавару: за гэта можаш не перажываць, гэта мая зона адказнасці, рускім у спіну я страляць не дазволю. І я гэта публічна гаварыў, адкрыта", - нагадаў Аляксандр Лукашэнка.

Паводле яго слоў, тады не было прадчування, што ўсё гэта выльецца ў настолькі сур'ёзнае процістаянне. Хоць амерыканцы загадзя інфармавалі Украіну аб тым, што можа адбыцца ў лютым 2022 года. "Украінцаў яны ў дэталях на працягу тыдня, я гэта памятаю, папярэджвалі. А яны не верылі або верылі крыху. Мы не верылі наогул", - сказаў Прэзідэнт.

Аб пазіцыі Беларусі і садзейнічанні Расіі і Украіне

Агульнавядома, што з самага пачатку канфлікту пазіцыя Беларусі і яе лідара наконт гэтага заставалася нязменнай - трэба садзіцца за стол перагавораў і знаходзіць мірныя спосабы ўрэгулявання. Са свайго боку Беларусь прыкладала ўсе намаганні, каб гэта адбылося, і прадаўжае настойваць на вяртанні да дыялогу. На вялікі жаль, гарачая фаза канфлікту пакуль прадаўжаецца. Але нават у такой сітуацыі проціборствуючыя бакі захоўваюць каналы для стасункаў.

"Зразумела, вядуцца пэўныя перагаворы. Упэўнены, што з аднаго і другога боку - гэта спецслужбы. І падключаюцца ваенныя, грамадзянскія... Дэпутаты падключаліся, упаўнаважаныя па правах чалавека, па правах дзіцяці і гэтак далей, - сказаў Прэзідэнт. - Тэхнічныя перагаворы ў гэтым плане ідуць на тэрыторыі Беларусі, пад маім кантролем. Усё ж такі мне блізкія ўкраінцы, блізкія расіяне. Гэта родныя людзі. Я хачу, каб тут было ўсё ў парадку. І там, дзе яны не могуць сустракацца адзін з адным, паміж імі працуюць беларусы".

У гэтай частцы кіраўнік дзяржавы расказаў аб ролі беларускага боку пры ажыццяўленні абмену целамі загінулых паміж Расіяй і Украінай. Паколькі абмен быў маштабны, украінскі бок звярнуўся з просьбай арганізаваць яго праз Беларусь па чыгунцы, якую раней яны ж самі ўзарвалі, асцерагаючыся якіх-небудзь пагроз. "Я гавару: добра, мы гатовы па чыгунцы, няхай аднаўляюць. Яны аднавілі чыгунку ўзарваную. Але ўмову паставілі: толькі беларусы. Састаў вязуць ва Украіну і з Украіны ў Беларусь, а потым у Расію, куды хочаце", - расказаў Аляксандр Лукашэнка.

Аб падзеях у Курскай вобласці Расіі

Журналіст нагадаў, што ў жніўні 2024 года Украіна зайшла на тэрыторыю Курскай вобласці Расіі. У сувязі з гэтым ён пацікавіўся, чаму Беларусь не аказала падтрымку свайму саюзніку, бо краіны звязаны абавязацельствамі ў ваеннай сферы, напрыклад дагаворам аб гарантыях бяспекі ў рамках Саюзнай дзяржавы.

"Вы ведаеце, гэта ж не нападзенне Украіны на Расію. Гэта вы так, можа, разглядаеце. Ідзе вайна, адбылося сутыкненне. Ідуць баі, і ў выніку гэтых баёў адны туды заходзяць, іншыя - сюды. І потым, мы выдатна ж ацэньвалі сітуацыю: не было неабходнасці нам там удзельнічаць, - сказаў Аляксандр Лукашэнка. - Я дакладна ведаў, як будуць дзейнічаць расіяне, вызваляючы курскую зямлю. Мяне Пуцін аб гэтым праінфармаваў. Я ведаў, што будзе аперацыя і якія сілы будуць прыцягнуты. Таму размовы аб тым, каб нам удзельнічаць у баі... Гэта ніякае не нападзенне. Гэта быў бой. У выніку гэтага бою, выкарыстоўваючы пэўныя вузкія месцы, яны (украінцы. - Заўвага БЕЛТА) выявілі гэту прабоіну і зайшлі ў Курскую вобласць вялікімі сіламі".

"Стратэгічна Пуцін меў рацыю. Я яму тады не верыў, што гэта была памылка з ваеннага пункту гледжання, таму што яны (Украіна. - Заўвага БЕЛТА) вялізныя сілы туды кінулі. Так і было. Прытым лепшыя сілы, падрыхтаваныя. Яны зайшлі туды. Цяпер яны практычна ўсе знішчаны. Выніку не дабіліся і агалілі іншыя ўчасткі фронту", - канстатаваў Прэзідэнт.

Ён таксама дадаў, што калі б Беларусь уцягнулася ў баявыя дзеянні, то гэта мела б зусім іншыя палітычныя і ваенныя наступствы.

"Расія выдатна разумее, а мы тым больш разумеем, што, калі мы ўвяжамся ў гэту вайну адкрыта, мы больш будзем мець праблем. Расія разумее, што нам будзе складана гэту граніцу ўтрымаць з улікам таго, што не толькі ўкраінцы супраць нас будуць ваяваць. Гэта будзе падстава для ўводу ва Украіну аж да натаўскіх войскаў. Пад выглядам наёмнікаў туды пойдуць людзі ў вялізнай колькасці: немцы, французы, англічане і іншыя, палякі - гэта факт. І нам давядзецца тут весці вайну супраць ужо натаўскіх войскаў. Мы ж гэта выдатна разумеем, - падкрэсліў кіраўнік дзяржавы. - Далей. Ракетамі будуць малаціць па Беларусі. Гэта ж побач зусім. Мы ж гэта разумеем. І расіяне гэта разумеюць".

Паводле слоў Аляксандра Лукашэнкі, гэта пытанне нават не даводзіцца выносіць на абмеркаванне з расійскім кіраўніцтвам, паколькі і Прэзідэнт, і ваенныя гэта разумеюць.

"І, дарэчы, кіраўнік ЦРУ да нас прыязджаў - Бернс. І я яму адкрыта гаварыў, што мы не збіраемся ваяваць і граніцу пераходзіць, але мы дапамагаем тут расіянам, - адзначыў Прэзідэнт. - Галоўнае пытанне ў яго было аб тым, ці не ўцягнецца Беларусь у гэту вайну, граніцы і іншае. Я гавару: "Слухайце, у нас з Расіяй нават размовы такой няма". Але, гавару, мы тут можам, мы гэта робім. Вядома, амерыканцы аб гэтым ведалі. Мы ж гэта не ўтойвалі. Мы рыхтавалі людзей. Я гавару: "І вы ж рыхтуеце ўкраінцаў. І не толькі. Вы лётчыкаў рыхтуеце. Англічане, немцы і іншыя". - "Так, рыхтуем. Добра, - гаворыць, - не прад'яўляем далей прэтэнзій. Але вы ж не збіраецеся праз граніцу ваяваць з Украінай?" Я кажу: "Не, у нас такіх планаў няма". Вось з Бернсам у нас была прыкладна такая размова. Гэта наша пазіцыя".

Аб ядзернай зброі і непрымальным уроне

Кіраўнік дзяржавы адзначыў, што істотны ўклад ва ўмацаванне абараназдольнасці Беларусі ўносяць расійскія партнёры. Аляксандр Лукашэнка растлумачыў, што Расія разумее стратэгічнае значэнне Беларусі для забеспячэння ўласнай нацыянальнай бяспекі, таму і аказвае ёй сваю падтрымку ў гэтым пытанні.

"Абсалютна шчыра скажу. Калі мы дапамагалі Расіі нямала (што гаварыць - боепрыпасамі і іншае), я сказаў свайму старэйшаму брату, сябру свайму: "Ведаеш, я ўсё гэта разумею, сітуацыя такая - і палякі там шалеюць, і іншыя. Мне патрэбны моцныя аргументы". - "Якія?" Я гавару: "Трэба вярнуць ядзерную зброю ў Беларусь". Яна вернута. Вы лічыце, што супраць ядзернай краіны нехта пачне вайну? Вы ведаеце, як бы не гарачыліся вы супраць Паўночнай Карэі, вы супраць яе вайну не пачынаеце", - заўважыў Прэзідэнт.

Адказваючы на ўдакладняючае пытанне журналіста аб ядзернай дактрыне Беларусі, Аляксандр Лукашэнка расказаў, што ім падпісаны адпаведны ўказ, які рэгламентуе абыходжанне з ядзернай зброяй. "Ён знаходзіцца ў сейфах у тых, у каго ён павінен знаходзіцца. Мы выразна разумеем і ўяўляем, што гэта такое, як гэта рабіць. Мэты вызначаны", - дадаў кіраўнік дзяржавы.

"У Расіі дастаткова сіл, каб нас узмацніць. Мы ж рыхтуемся да вайны. Я гэта адкрыта гаварыў: мы кожны дзень, кожны месяц рыхтуемся да вайны, каб пазбегнуць яе, - заявіў беларускі лідар. - Мы ведаем, што рабіць. Мы атрымалі ўрокі з усіх апошніх войнаў. Наша канцэпцыя заснавана на тым, што мы гатовы нанесці непрымальны ўрон Польшчы, Літве, Латвіі там, Эстоніі - хто супраць нас будзе ваяваць. Непрымальны ўрон. Я адзін з элементаў вам толькі што апісаў. Таму яны разумеюць, што ў гэтым выпадку мы, можа, і не пераможам у гэтай вайне, але морду наб'ём добра. І Расія ў тым аб'ёме, які нам сёння патрэбны, дапамагае і дапаможа як саюзнік".

Аляксандр Лукашэнка нагадаў, што да канца года ў Беларусі з'явіцца ракетны комплекс "Арэшнік", які можа несці і ядзерны боезарад. Першыя пазіцыі, дзе ён будзе размешчаны, ужо вызначаны.

"Прымяняць ядзерную зброю ні Пуцін, ні я, ніхто не хоча. Мы ж не самазабойцы. Але вашы сатэліты, вашы сябры, саюзнікі няхай таксама гэта зразумеюць, і я адкрыта гаварыў: калі толькі нехта пераступіць нашу граніцу, мы адкажам адразу ўсёй той зброяй, якая ў нас ёсць. Гэта не запалохванне, я проста папярэджваю", - падкрэсліў Прэзідэнт.

Аб сваім пераемніку і новым прэзідэнцкім тэрміне

Закраналіся ў час інтэрв'ю і асабістыя тэмы. Журналіст адзначыў, што пра малодшага сына кіраўніка дзяржавы Мікалая ў заходніх СМІ часта пішуць як пра пераемніка Аляксандра Лукашэнкі на прэзідэнцкай пасадзе.

"Не, ён не пераемнік. Я так і думаў, што ты хочаш спытаць. Не, не, не. Вось ты ў яго спытай - ты яго можаш так моцна пакрыўдзіць гэтым", - заявіў кіраўнік дзяржавы.

Аляксандр Лукашэнка дапусціў, што наступным Прэзідэнтам Беларусі можа стаць чалавек, які будзе праводзіць крыху іншую палітыку. "Толькі адразу няхай нічога не ламае, а так, як я рабіў, - абапіраючыся на плечы моцных, на тое, што ёсць, спакойна эвалюцыйна развіваў краіну, каб не было вось гэтай ломкі рэвалюцыйнай. А калі ён пераканае грамадства, што трэба ісці да нейкага іншага стану, калі ласка", - сказаў Прэзідэнт.

Кіраўнік дзяржавы таксама адказаў на пытанне, ці плануе ён вылучацца на новы прэзідэнцкі тэрмін: "Не, я цяпер ужо не планую, ужо не планую. Я, адзінае, магу сабе дазволіць недзе для сябе, я гэта таксама не агучваў: ну, слухайце, калі Трампу будзе 80, і ён добра выглядае…"

Аб лініі размежавання паміж Украінай і Расіяй

Вяртаючыся да тэмы мірнага ўрэгулявання сітуацыі ва Украіне, журналіст пацікавіўся ў беларускага лідара, як, на яго думку, можа выглядаць у будучым лінія размежавання паміж Украінай і Расіяй. Паводле слоў Аляксандра Лукашэнкі, гэта будзе залежаць ад таго, як дамовяцца бакі канфлікту. "Можна дамовіцца, што з аднаго і з другога боку будзе дэмілітарызаваная (а на самай справе правільна - мілітарызаваная) зона - кіламетр, два або пяць. Гэта жах", - адзначыў Прэзідэнт.

"Гэта жах. Мёртвая зона велізарная", - згадзіўся карэспандэнт.

"Так, мёртвая зона. Але я спадзяюся, што да гэтага не дойдзе. Будзе звычайная граніца. Так, узмоцненая ахова з аднаго і з другога боку. Але ў гэтай зоне можна працаваць. У нас цяпер і ў савецкі час была пагранічная зона. Туды ўезд быў забаронены. А калі дазволены, то з пэўным пропускам, дазволам і гэтак далей. Але там жылі людзі, - нагадаў Аляксандр Лукашэнка. - Таму гэта пытанне дамоўленасцей. І потым, жыццё адрэгулюе. І граніцы потым могуць быць зняты".

Пры гэтым Прэзідэнт Беларусі ўпэўнены, што Уладзімір Пуцін хутчэй за Уладзіміра Зяленскага згодзіцца на тое, каб наладзіць жыццё людзей у прыграніччы: "Ён больш моцны".

Кіраўнік беларускай дзяржавы таксама заўважыў, што калі б Зяленскі ў свой час прыслухаўся да яго, то Украіна не страціла б такія тэрыторыі.

"Калі разумна правесці перагаворы і пайсці на ўступкі Расіі, а Расіі - на ўступкі Украіне (трэба вызначыць гэтыя пытанні і зрабіць узаемныя ўступкі), Расія ніколі больш не будзе ваяваць з Украінай. Ніколі", - перакананы Аляксандр Лукашэнка.

Ён таксама пракаменціраваў меркаванні аб тым, што Расія рыхтуецца да вайны з НАТА, хоча напасці на краіны Балтыі і Польшчу. "Гэта глупства поўнае. Паверце, гэтага няма. Я ведаю гэта дакладна. Няма ў Пуціна і ў ваенна-палітычнага кіраўніцтва Расіі такіх мэт - ваяваць супраць НАТА. Гэта неразумна было б. У агляднай будучыні - дакладна. Ну, калі вы нейкага глупства не наробіце... Нам ўсяго хапае тут", - падкрэсліў Прэзідэнт.

У той жа час ён не стаў выключаць, што сітуацыя на фронце зменіцца такім чынам, што граніцу давядзецца праводзіць па Дняпры, а значыць, Кіеў можа застацца на расійскім баку. "Вось чаго трэба асцерагацца, што можаце страціць усю Украіну. А наогул яе могуць падзяліць: Венгрыя кавалачак забярэ,Польшча - яна ўжо рукі пацірае Заходнюю Украіну прыхапіць і гэтак далей. І застанецца нейкая палосачка", - дадаў Аляксандр Лукашэнка.

"Паражэння ў Расіі не будзе. Паражэнне вельмі дорага абыдзецца ўсім нам. Вам перш за ўсё. У тым ліку людзям за акіянам. Таму ў ядзернай гэтай краіны першае месца па ядзерным запасе. Паражэння не будзе. Не будзе! А вось Украіна можа пацярпець паражэнне. Не трэба гэтага дапусціць. Давайце дамовімся цяпер", - заклікаў беларускі лідар.

Аб перагаворах паміж Расіяй, ЗША і Украінай

Аляксандр Лукашэнка нагадаў, што яшчэ тады, калі ў Мінску праходзілі першыя перагаворы па ўрэгуляванні крызісу ва Украіне, ён гаварыў аб неабходнасці падключыць да гэтага амерыканцаў, інакш толку не будзе. Аднак ні Дональд Трамп у час свайго першага тэрміну, ні Джо Байдэн так і не падключыліся да перагавораў.

Цяперашні ж ультыматыўны падыход амерыканскага боку Прэзідэнт Беларусі таксама лічыць недарэчным. Больш таго, Аляксандр Лукашэнка не ўпэўнены, што гэта не спектакль з боку ЗША.

"Так не робіцца: "Я прыйшоў, сказаў, 50 дзён даў". Гэта не Іран, каб узяў і скінуў тры бомбы, а потым даў справаздачу: "Усё, больш не буду. Давайце, мужыкі, будзем мірыцца". Трэба сустракацца, трэба размаўляць", - падкрэсліў кіраўнік дзяржавы.

Паводле яго слоў, Прэзідэнт Расіі можа згадзіцца, напрыклад, на паветранае перамір'е, але на гэты крок адначасова павінна пайсці і Украіна.

"Збярыцеся ўтрох дзе-небудзь. Трамп, Пуцін - дамоўцеся ў першы дзень і запрасіце Зяленскага. У першы дзень пагаварыць аб расійска-амерыканскіх адносінах, а ў другі - па гэтай праблеме. Запрасіце Зяленскага, пакладзіце на стол: вось паветранае перамір'е", - сказаў Аляксандр Лукашэнка.

Журналіст нагадаў, што Уладзімір Зяленскі клікаў Уладзіміра Пуціна на перагаворы ў Саудаўскую Аравію, аднак Прэзідэнт Расіі праігнараваў гэта запрашэнне. Аляксандр Лукашэнка адказаў, што абмяркоўваў гэта пытанне са сваім расійскім калегам і на яго месцы зрабіў бы гэтак жа.

"Шчыра скажу, калі ў мяне Пуцін спытаў: "Ты як зрабіў бы?", я гавару: "Валодзя, табе там рабіць няма чаго". Гэта было маё меркаванне. Гэта выглядала, разумееце, як пазёрства нейкае. Прыляцеў: "Я цябе тут чакаю, давай, прыязджай на дыван, тут недзе Трамп". Так не робіцца ў палітыцы. І ніколі Пуцін на гэта не пойдзе. Вось гэта той выпадак, калі ні ў якім разе яму нельга было ісці на гэта. І я яго тады падтрымаў, шчыра вам гавару. Я яму сказаў: "Правільна, табе там рабіць няма чаго". Гэта што за пазёрства такое?" - спытаў кіраўнік дзяржавы.

"Загадзя давайце вызначымся: напрыклад, горад-герой Мінск, Стамбул, Жэнева, вызначыліся - праз месяц будзе гэта сустрэча. Першы дзень - амерыкана-расійскія адносіны, напрыклад, абмяркоўваем. У другі дзень, калі прыйдзем да згоды па праекце дакумента нейкага, запрашаем Зяленскага, Лукашэнку, Пятрова, Сідарава. Гэта будзе выглядаць дастойна. Гэта загадзя. А то ён, як хлапчук, выскачыў з самалёта: "Я чакаю Пуціна". Ты чаго? Гэта, на ўсялякі выпадак, Прэзідэнт вялізнай ядзернай дзяржавы, упоравень са Злучанымі Штатамі Амерыкі", - заўважыў Аляксандр Лукашэнка.

Прэзідэнт перакананы, што Уладзімір Пуцін, як і расійскае грамадства, хоча міру і гатовы да перагавораў: "Пастаўцеся да яго з павагай. Гэта не якасць яго асабістага характару. Гэта якасць нашага характару, як яны кажуць, рускага свету, славян і гэтак далей. Ды і амерыканцаў у тым ліку. Уявіце Трампа на месцы Пуціна. Пуцін недзе там баражыруе па Блізкім Усходзе, а нейкі Зяленскі, якому вы вывалачку незразумела за што і як зрабілі ў Авальным кабінеце, патэлефанаваў Трампу... Ці не патэлефанаваў, а праз СМІ перадаў: "Я тут сяджу, чакаю аднаго і другога. І, Трамп, ты прыязджай". Слухай, пасля гэтага ніводнага кулямёта ён не паставіў бы Украіне з-за гэтага ўніжэння".

Аб магчымай сустрэчы Пуціна, Трампа і Зяленскага

У час размовы з журналістам Аляксандр Лукашэнка пацвердзіў гатоўнасць пры неабходнасці арганізаваць трохбаковую сустрэчу Уладзіміра Пуціна, Дональда Трампа і Уладзіміра Зяленскага. Пры гэтым Прэзідэнт падкрэсліў, што да такіх перагавораў нельга падыходзіць спантанна, яны маюць патрэбу ў папярэдняй прапрацоўцы і падрыхтоўцы.

Ён дапусціў, што такія перагаворы можна было б арганізаваць у Мінску. Паводле слоў Аляксандра Лукашэнкі, Уладзімір Пуцін з задавальненнем сустрэўся бы з Дональдам Трампам у беларускай сталіцы. Застанецца задаволены сустрэчай і амерыканскі лідар, перакананы кіраўнік дзяржавы.

"Давайце рабіць маленькія крокі. А "50 дзён, не зробіце - мы гэта" - слухайце, гэта несур'ёзна", - лічыць кіраўнік дзяржавы.

Журналіст выказаў сумненне, што сустрэчу можна арганізаваць вось так лёгка да спынення агню.

"Правільна, трэба падрыхтаваць загадзя, - адказаў Аляксандр Лукашэнка. - Трэба падрыхтаваць гэты візіт. Хочаце, я вазьмуся за гэта. Амерыканская частка, расійская. Я гатовы за гэта ўзяцца, падрыхтаваць гэту сустрэчу. У імя міру. І вось давайце пачнём рыхтаваць - пагледзіце, што Зяленскі зробіць. Ён будзе ўпірацца: "Я катэгарычна супраць!"

Карэспандэнт Time таксама згадзіўся з тым, што Уладзімір Зяленскі не стане прыязджаць у Мінск на перагаворы.

Аднак Прэзідэнт заўважыў: "А што яму Мінск? Мінск яму дабра жадае больш, чым дзе".

Кіраўнік дзяржавы нагадаў, што беларускі бок цяпер удзельнічае ў арганізацыі абменаў палоннымі і целамі загінулых паміж Расіяй і Украінай. Да гэтага прыцягнуты байцы спецпадраздзялення "Альфа", якія літаральна на руках пераносяць целы.

"Што яму карціць у адносінах да Беларусі? Наадварот, трэба задзейнічаць Беларусь у гэтым працэсе", - падкрэсліў Аляксандр Лукашэнка.

На яго думку, на еўрапейскіх партнёраў у гэтых пытаннях разлічваць не варта: яны паказалі ўжо свой сапраўдны твар, увёўшы аднойчы абмежаванні на экспарт збожжа Украіны. "Трамп мае рацыю, што нахіляе гэту Еўропу (толькі каб гэта не быў спектакль). І Трамп можа шмат што зрабіць. І на прамежкавых выбарах ён перамог бы, і новым Прэзідэнтам быў бы. Калі не ён, то Джэй Дзі Вэнс. Прыстойны чалавек, мне падабаецца ён", - сказаў кіраўнік дзяржавы.

Прэзідэнт таксама звярнуў увагу на пэўныя перакосы ў амерыканскіх СМІ, маўляў, Пуцін - дрэнны, Зяленскі - добры, Трамп - яшчэ лепшы.

"Давай аб'ектыўна. Балбатун Трамп? Балбатун. Прыклад: раніцай гаворыць адно, вечарам робіць іншае. Ёсць гэта. Вынікаў пакуль няма. Пачынае, як паліцэйскі, размахваць шашкай у свеце. Узяўся за лідарства - ажыццяўляй яго. А лідарства - гэта прадухіленне сутыкненняў і войнаў", - заўважыў кіраўнік дзяржавы.

"Калі аб'ектыўна, чаму вы не папракаеце Пуціна гэтак жа за яго дзеянні, за агрэсію?" - спытаў журналіст.

"І Пуціна гэтак жа папракаю. Тое, што я табе не гавару, гэта не значыць, што я не папракаю, - заявіў Аляксандр Лукашэнка. - І ў Пуціна памылкі пэўныя. Упэўнены, што ён аб многіх рэчах шкадуе, аб многіх. Але рэаліі ёсць рэаліі, і давайце з гэтых рэалій зыходзіць. Ні я, ні вы, ні Пуцін і ні Трамп - мы не вечныя. Усё зменіцца літаральна ў бліжэйшыя дзве пяцігодкі, у бліжэйшыя 10 гадоў. Але давайце мы вырашым праблему, зыходзячы з рэалій, сёння".