Беларусь прадставіць свае падыходы ў галіне правоў чалавека на пасяджэнні Генасамблеі ААН

Намеснік міністра замежных спраў Беларусі Валянцін Рыбакоў 12-14 ліпеня прыме ўдзел у пасяджэнні Генасамблеі ААН высокага ўзроўню па правах чалавека ў Нью-Ёрку. Яго тэма - "ААН 70 - правы чалавека ў цэнтры глабальнага парадку дня". Валянцін Рыбакоў прадставіць падыходы Беларусі ў галіне правоў чалавека ў кантэксце выканання новага парадку дня ў галіне развіцця да 2030 года. У межах візіту намеснік міністра правядзе шэраг сустрэч з кіраўніцтвам ААН. Плануецца абмеркаваць беларускую ініцыятыву па падтрымцы традыцыйнай сям'і, а таксама ўзаемадзеянне ў рамках праектаў тэхнічнай дапамогі па лініі ЮНІСЕФ для краін з сярэднім узроўнем даходу, да якіх адносіцца Беларусь.