Як дэградуе глабальная бяспека? Аляксандр Лукашэнка назваў чатыры сферы, якія аказаліся пад ударам

Фота: belta.by

Усёабдымная бяспека па азначэнні павінна даваць гарантыі дзяржавам не толькі ў ваеннай, але і ў палітычнай, эканамічнай, інфармацыйнай і іншых сферах. Гэта падкрэсліў Прэзідэнт Беларусі Аляксандр Лукашэнка на II Мінскай міжнароднай канферэнцыі па еўразійскай бяспецы, перадае карэспандэнт БЕЛТА.

У сваім выступленні Аляксандр Лукашэнка тэзісна выклаў сваё бачанне існуючых праблем і шляхоў іх вырашэння. Паводле яго слоў, перш чым разважаць аб глабальнай бяспецы, неабходна пачаць з азначэння самога паняцця.

"Як правіла, гаворачы пра бяспеку, маюць на ўвазе гарантыі абароны ад замахаў на сваю тэрыторыю. Аднак усёабдымная бяспека па азначэнні павінна даваць гарантыі дзяржавам не толькі ў ваеннай сферы, але і ў палітычнай, эканамічнай, інфармацыйнай і іншых. Калі глядзець пад такім вуглом, становіцца відавочным маштаб крызісу, які ахапіў планету", - адзначыў Прэзідэнт.

Паводле яго слоў, прысвоіўшы самім сабе пасля развалу ўсяго сацыялістычнага лагера званне "лідара свабоднага свету", ЗША, нягледзячы на ўвесь свой патэнцыял, аказаліся няздольнымі быць адной глабальнай апорай і гарантам бяспекі ў самым шырокім сэнсе гэтага паняцця. А міжнародныя інстытуты, прызначаныя быць універсальным мадэратарам або арбітрам, сёння часам дэманструюць поўны параліч.

"Адсутнасць сістэмы стрымліванняў і проціваг прывяла да дэградацыі бяспекі ва ўсіх сферах", - заявіў беларускі лідар.

Першае. Палітыка

Аляксандр Лукашэнка падкрэсліў, што ў свеце ў наяўнасці крах усіх пастулатаў дэмакратыі.

"Мы бачым: ёсць дэмакратыя для сябе, а ёсць дэмакратыі на экспарт. Якімі дэмакратычнымі каштоўнасцямі можна растлумачыць тое, што адбываецца на Блізкім Усходзе, і тое, што адбылося ва Украіне? Няўжо верхам дэмакратыі з'яўляецца магчымасць фізічнага ўстаранення чалавека, якога, напрыклад, ЗША і іх сатэліты палічаць пагрозай для нацыянальнай бяспекі? Любога - ад палітычнага і грамадскага дзеяча да бізнесмена, вучонага або журналіста, - адзначыў Прэзідэнт. - Або новы "дэмакратычны" трэнд - палохаць Міжнародным крымінальным судом кіраўнікоў суверэнных дзяржаў".

"А што агульнага з дэмакратыяй мае аб'яўленне персонай нон грата Генеральнага сакратара Арганізацыі Аб'яднаных Нацый за яго прынцыповую пазіцыю, якую ён нарэшце адкрыта выказаў? Або як расцаніць несціхаючыя нападкі на таго ж Антоніа Гутэрыша за тое, што ён наведаў саміт БРІКС - аб'яднанне краін, якія даюць амаль 40 працэнтаў сусветнага ВУП?" - звярнуў увагу кіраўнік дзяржавы.

Ён канстатаваў, што нападкі зведваюць не толькі асобныя лідары, але і цэлыя народы. Так, у дзяржавах, якія асмеліліся ісці сваім шляхам, інспіруюцца каляровыя рэвалюцыі, прыводзяцца да ўлады лаяльныя лідары і сапраўдныя марыянеткі за грошы заходняй "мяккай сілы" - так званых няўрадавых або некамерцыйных арганізацый.

"Разгул "дэмакратыі" прывёў да расколу грамадзянскай супольнасці ў страшна вялікіх памерах. Мы назіраем пажаранебяспечную сітуацыю ў Германіі, Францыі, Польшчы, Малдове, Грузіі і іншых. Ды і саму Амерыку ліхаманіць апошняе дзесяцігоддзе", - заўважыў Аляксандр Лукашэнка.

Адной з прычын сённяшніх падзей у свеце стаў міграцыйны крызіс, заявіў Прэзідэнт. Ён звярнуў увагу на тое, што гібель і збіванні бежанцаў і мігрантаў на тэрыторыі краін калектыўнага Захаду сталі страшнай штодзённай рэальнасцю. Але аб гэтым сусветныя СМІ маўчаць, затое абвінавачанні Беларусі ў стварэнні гэтага крызісу не сыходзяць з першых палос.

"Мы "вінаваты" ў гэтым сусветным міграцыйным крызісе. Прытым што асноўны маршрут гэтых людзей не мяняецца шмат гадоў - праз Міжземнае мора, Балканскі паўвостраў штогод праходзіць да паўмільёна чалавек. Еўропа не здольна ў сябе навесці парадак, але добра ведае, як адцягнуць увагу ад унутраных праблем - назначыць знешняга ворага", - падкрэсліў беларускі лідар.

Другое. Ваенная бяспека

"Дзяржавы ўсё часцей вымушаны прымяняць ваенную сілу для абароны свайго суверэнітэту, унутранай стабільнасці або недапушчэння эскалацыі, што вельмі важна сёння. Далейшае разрастанне ўкраінскага і блізкаўсходняга канфліктаў тоіць у сабе непапраўныя наступствы глабальнага маштабу", - падкрэсліў Аляксандр Лукашэнка.

Разам з тым кіраўнік дзяржавы заўважыў, што, засяродзіўшы ўвагу толькі на гэтых двух ачагах, свет чамусьці ігнаруе той факт, што сёння налічваецца каля 55 узброеных канфліктаў. У іх штодзённа тысячамі гінуць людзі. "Вазьміце еменскі канфлікт, які калектыўнаму Захаду засвечваць нібыта няёмка, - прывёў прыклад Прэзідэнт. - А калі ўзяць перспектыву, то Блізкі Усход і Украіна разам узятыя адпачываюць. Там, у Індыйскім акіяне і тым заліве, які хусіты сёння кантралююць, можа здарыцца такая катастрофа, што нам і не снілася".

Ён таксама нагадаў, што фактычна не засталося законных міжнародна-прававых інструментаў, якія фарміруюць гарантыі ў сферы ваеннай бяспекі. Па вялікім рахунку засталося толькі два дагаворы: аб нераспаўсюджванні ядзернай зброі і аб стратэгічных наступальных узбраеннях.

"Ды і тыя не працуюць: першы практычна не выконваецца, а другі маральна ўстарэў. Што асабліва паказальна, не вядзецца ніякай работы па заключэнні новых пагадненняў у гэтай сферы. Значыць, некаму яны не патрэбны. І гэта ў першую чаргу на сумленні палітыкаў, а не ваенных", - заявіў беларускі лідар.

Трэцяе. Эканоміка

Аляксандр Лукашэнка канстатаваў, што незаконнымі санкцыямі абкладзена паўсвету, нелегітымнымі абмежаваннямі паралізаваны цэлыя галіны эканомікі, а права прыватнай уласнасці знішчана. "Арыштоўваюцца дзяржаўныя актывы і нахабна раскрадаюцца суверэнныя фінансавыя рэсурсы. Узрываюцца газаправоды, перакрываецца доступ да мора", - пералічыў толькі некаторыя пагрозы Прэзідэнт.

Ён таксама адзначыў, што набыццё тавараў заходніх брэндаў больш не з'яўляецца гарантыяй тэхналагічнай бяспекі, бо ў любы момант яны могуць адмовіць у пастаўках запасных частак або ў сэрвісным абслугоўванні.

"Падарвана сістэма міжнароднага падзелу працы, якую мы з такімі намаганнямі выбудоўвалі. А наступны крок - гэта пашырэнне пратэкцыянізму і закрытыя эканомікі? Мы што, будзем рухацца не наперад, а назад?" - сказаў кіраўнік дзяржавы.

У век высокіх тэхналогій на парадку дня па-ранейшаму востра стаіць пытанне няхваткі прадуктаў харчавання. "Маштабы голаду на планеце ўжо набліжаюцца да лічбаў пасляваенных гадоў (галадае каля 750 мільёнаў чалавек, яшчэ амаль 3 мільярды не маюць паўнацэннага харчавання). Гэта як называць?" - адзначыў Аляксандр Лукашэнка.

Пры гэтым краіны - экспарцёры прадуктаў харчавання, угнаенняў, сельгастэхнікі пазбаўляюцца па палітычных матывах права пастаўляць сваю прадукцыю туды, дзе ў ёй маюць вострую патрэбу.

"Накіраваныя на разбурэнне нацыянальных эканомік, у сапраўднасці санкцыі працуюць супраць простых людзей. У такіх умовах аб якім выкананні абавязацельстваў па Мэтах устойлівага развіцця ААН можа быць размова? Цалкам відавочна, што без бандыцкіх забарон і абмежаванняў Захаду свет значна бліжэй падышоў бы да вырашэння гэтых задач", - заявіў беларускі лідар.

Чацвёртае. Інфармацыйная бяспека

"Сродкі масавай інфармацыі ператварыліся ў рэальную зброю. Постпраўда, бясконцыя фэйкі, маніпуляванне грамадскай думкай, завалодванне фінансавымі сродкамі, арганізацыя дзяржаўных пераваротаў маюць транснацыянальны характар і моц больш небяспечную за любую ваенную інтэрвенцыю. І толькі паспрабуй варухнуцца не так, як яны там спланавалі. Не з той нагі ўсталі раніцай - і пайшло", - падкрэсліў Прэзідэнт.

Усё часцей для знішчэння чалавецтва спрабуюць прымяніць перадавыя распрацоўкі ў галіне штучнага інтэлекту, біятэхналогій, нейрасетак, квантавай фізікі. "Грамадства яшчэ не раз зведае хваляванне, калі адкрыюцца абуральныя факты рэальнай дзейнасці амерыканскіх біялабараторый па ўсім свеце, асабліва па перыметры Беларусі і Расіі", - заявіў кіраўнік дзяржавы.

"Я мог бы доўга пералічваць гэтыя "дасягненні" заходняй цывілізацыі. Ды і заходнюю цывілізацыю таксама можна ўзяць у двукоссе. У свой час Махатма Гандзі на пытанне, што ён думае пра заходнюю цывілізацыю, мудра адказаў: "Думаю, гэта была б нядрэнная ідэя", - прывёў цытату вядомага палітычнага дзеяча і філосафа Прэзідэнт.