Выступленне Прэзідэнта Беларусі на цырымоніі ўручэння прэміі "За духоўнае адраджэнне"

Фота: belta.by

Выступленне Прэзідэнта Беларусі Аляксандра Лукашэнкі на цырымоніі ўручэння прэміі "За духоўнае адраджэнне", спецыяльных прэмій дзеячам культуры і мастацтва і "Беларускі спартыўны Алімп"

Дарагія сябры!

Паважаныя лаўрэаты!

Уладыка!

Калядныя дні ствараюць асаблівую атмасферу і натхняюць на добрыя справы.

Гэтак было спрадвеку. Такім мы разумеем гэта светлае свята i сёння.

У ім вытокі нашай цырымоніі ўшаноўвання ў першыя дні новага года лаўрэатаў прэміі "За духоўнае адраджэнне" і спецыяльных прэмій Прэзідэнта. А само мерапрыемства ўжо стала традыцыяй суверэннай Беларусі.

І мы не ўяўляем гэтыя чароўныя дні без прыгожага ўрачыстага моманту - моманту заслужанай славы нашых дастойных людзей.

Нашы лаўрэаты - сапраўдныя падзвіжнікі і творцы сапраўднага мастацтва, захавальнікі душы беларускага народа.

Сёння мы адзначаем заслугі дзеячаў культуры, якія захоўваюць і ўзбагачаюць нацыянальную скарбніцу, абуджаюць цікавасць да народных рамёстваў, выхоўваюць павагу да нашых традыцый.

Сярод узнагароджаных таксама свяшчэннаслужыцелі, урачы, сацыяльныя работнікі - неабыякавыя людзі, якія працягнулі руку дапамогі тым, хто сутыкнуўся з цяжкасцямі. Бескарысліва, па закліку сэрца клапоцяцца аб дзецях, якія трапілі ў няпростую сітуацыю ў жыцці.

Мы ганарымся поспехамі на буйнейшых сусветных турнірах нашых вядомых спартсменаў і трэнераў, удастоеных прэміі "Беларускі спартыўны Алімп".

Усе дасягненні лаўрэатаў і іх дзейнасць маюць высокае духоўнае і патрыятычнае гучанне.

Асабліва важна гэта цяпер, калі краіна рыхтуецца адзначыць свяшчэнную дату - 80-годдзе Вялікай Перамогі. Мы беражліва захоўваем памяць аб мінулым, упэўнена рухаемся наперад і смела глядзім у будучыню.

Дзякуй вам за дасягненні і перамогі.

Але важна і іншае. Значнасць вашай работы намнога большая, чым вы, магчыма, самі гэта ўсведамляеце.

Кожны ваш поспех натхняе многіх беларусаў на новыя справы, такія ж добрыя, чалавечныя і вельмі патрэбныя.

Таму з году ў год мы сустракаемся на гэтай сцэне з людзьмі, якімі кіруюць самыя шчырыя пачуцці - вернасць свайму прызванню і любоў да роднай зямлі.

І менавіта дзякуючы вам, паважаныя лаўрэаты, вашаму служэнню высокім ідэалам мы паспяхова процістаім тым выклікам, якія перад намі ставіць час. Час хаосу, войнаў, дэвальвацыі сапраўдных каштоўнасцей.

А ісціна простая: у аснове любой чалавечай дзейнасці знаходзяцца духоўнасць і маральнасць (як я часта гавару, справядлівасць) - жыватворны эліксір для культуры, трывалай сувязі пакаленняў і традыцый.

Яны і аснова адзінства нацыі, якая ведае сваю гісторыю, шануе спадчыну продкаў і клапоціцца пра будучыню. Аснова таго, што вызначае характар народа.

Духоўнасць і маральнасць - фундамент моцнай, незалежнай дзяржавы.

Дарагія сябры!

Я віншую лаўрэатаў прэміі "За духоўнае адраджэнне", спецыяльных прэмій дзеячам культуры і мастацтва і "Беларускі спартыўны Алімп".

Дзякуючы такім людзям, як вы - патрыётам, стваральнікам, наша родная Беларусь застаецца астраўком міру, спакою, чалавекалюбства і міласэрнасці.

Як бы нехта ні імкнуўся нас сёння расхістаць, нічога не атрымаецца. Нічога не атрымаецца! Мы зберажом сваю краіну. Яна ўжо належыць нашым дзецям і ўнукам. Таму мы павінны падумаць пра іх будучыню, і мы думаем.

Мы ўсё зробім у будучай пяцігодцы, каб наша краіна назаўсёды забыла праблему захавання сваёй дзяржаўнасці. Наша краіна будзе...

Наша краіна заўсёды будзе дзяржавай, насуперак любым плыням і тэндэнцыям на міжнароднай арэне.

Я таксама хачу павіншаваць усіх нашых беларусаў з Раством. Пажадаць ім радасці. Каб вы ўсміхаліся, каб дзеці вас ніколі не засмучалі, вашы любімыя, блізкія, родныя, таварышы па службе заўсёды неслі вам радасць.

Жадаю міру, дабрабыту. Няхай вам ва ўсім садзейнічае поспех, а побач будуць з вамі заўсёды родныя і блізкія.

Трэці раз вось так публічна пры вялікай аўдыторыі я гавару аб тым, што будучы год будзе няпросты. І я гэта гавару вам адкрыта. І запомніце, хто б вам тут ні абяцаў залатыя горы, нам давядзецца напружвацца ў два разы больш, чым у папярэднім годзе.

Але мы пераадолеем усе цяжкасці. Не толькі таму, што я хачу банальна сказаць: "Мы адзіныя, мы натхнёныя..." Мы навучыліся працаваць! У складаных умовах. Калі на нас націскаюць з усіх бакоў.

Здавалася б, не, не вытрымаем. Але памятаеце мае словы, я сказаў: "Забудзьце пра санкцыі, іх няма!" І гэта нас выратавала. Калі б толькі мы, беларусы, - эмацыянальныя людзі - акунуліся ў гэтыя разважанні аб санкцыйнай палітыцы, слухайце, мы абвалілі б эканоміку, а следам і наша жыццё, і нашу дзяржаву.

Таму санкцыі, не санкцыі - проста жыццё складваецца такім чынам, што ў любой сітуацыі нам давядзецца выжываць, вытрымліваць гэты націск. Мы яго вытрымаем!

Але я таксама гавару аб тым, што будучы год і, напэўна, уся пяцігодка пройдуць пад лозунгам міру і бяспекі. Будзе мір - усё астатняе дадасца. Трэба зберагчы мір для Беларусі. І мы зробім гэта разам з вамі.

І апошні тэзіс, вельмі важны - новае пакаленне. Да ўлады прыходзяць, не толькі да ўлады... Мы аддаём нашу краіну ў рукі новаму пакаленню.  Я чаму вам аб гэтым гавару? Я гаварыў аб гэтым у царкве і гэтак далей для таго, каб людзі пачулі. А вам гавару, таму што нам з вамі давядзецца гэта пакаленне сфарміраваць і нам з вамі давядзецца іх пасадзіць у свае крэслы - работнікаў творчых, культуры і гэтак далей, і да таго падобнае. І ва ўладу. Найцяжэйшая работа, але мы настроены яе арганізаваць і правесці.

Шчасця вам! Не перажывайце. Слухайце, ну, жыццё ж не толькі складаецца з таго, што будзе заўтра, паслязаўтра і іншае. Гэта важна - бачыць заўтрашні дзень. Але мы ж жывём кожны дзень, і сёння. Сёння светлыя дні, светлыя святы - Новы год, Нараджэнне Хрыстова. Хутка, дасць бог, Вялікдзень...

Таму заўсёды, калі толькі можна ўсміхацца, весяліцца і радавацца, - усміхайцеся, весяліцеся і радуйцеся. Шчасця вам, дабрабыту і поспехаў!