Кітайска-беларускі індустрыяльны парк "Вялікі камень" і Сучжоўскі індустрыяльны парк падпісалі пагадненне аб супрацоўніцтве, паведамілі ў прэс-службе МЗС Беларусі.

Пагадненне было падпісана пасля заканчэння другога пасяджэння беларуска-кітайскай камісіі па гандлёва-эканамічным супрацоўніцтве, а таксама восьмага пасяджэння рабочай групы па пытаннях Кітайска-беларускага індустрыяльнага парка, якія прайшлі сёння ў Нанкіне (Кітай).

У час сустрэч бакі таксама разгледзелі шырокае кола пытанняў гандлёва-эканамічнага ўзаемадзеяння, у тым ліку супрацоўніцтва ў сферы прамысловасці, сельскай гаспадаркі, інвестыцый, навукі і адукацыі. Узгоднены перспектыўныя крокі па развіцці беларуска-кітайскага супрацоўніцтва ў розных галінах.

З беларускага боку ў пасяджэннях прынялі ўдзел намеснік кіраўніка Адміністрацыі Прэзідэнта Мікалай Снапкоў, міністр эканомікі Уладзімір Зіноўскі, намеснік міністра замежных спраў Валянцін Рыбакоў, Надзвычайны і Паўнамоцны Пасол Беларусі ў КНР Кірыл Руды, а таксама прадстаўнікі профільных міністэрстваў.

Кітайскую дэлегацыю ўзначаліў намеснік міністра камерцыі Чжун Шань, а таксама намеснік старшыні Камітэта па кіраванні дзяржмаёмасцю пры Дзяржсавеце КНР Хуан Даньхуа.