Беларускія канаісты Андрэй і Аляксандр Багдановічы заваявалі першае золата для зборнай краіны на Еўрапейскіх гульнях. На вяслярным канале ў Менчэгіры беларусы выйгралі фінальны заезд у каноэ на дыстанцыі 1000 м з вынікам 3 хвіліны 34,412 сек. На працягу ўсёй дыстанцыі будучыя пераможцы трымаліся ў цені, а на фінішы зрабілі вырашальны рывок, які дазволіў ім абысці расіян Ілью Пярвухіна і Аляксея Каравашкава, якія занялі другое месца, і бронзавых прызёраў немцаў Петэра Крэчмера і Міхаэля Мюлера. Для зборнай Беларусі перамога братоў Багдановічаў адкрыла лік залатых медалёў на першых Еўрапейскіх гульнях у Баку.