Аляксандр Лукашэнка: Прыярытэт дзяржаўнай палітыкі Беларусі - пабудова агульнадаступнай і эфектыўнай сістэмы аховы здароўя

Прыярытэт дзяржаўнай палітыкі Беларусі - пабудова агульнадаступнай і эфектыўнай сістэмы аховы здароўя. Гэта гаворыцца ў звароце Прэзідэнта Аляксандра Лукашэнкі нарадзе высокага ўзроўню Генасамблеі ААН па пытаннях барацьбы са СНІДам. У апошнія гады дзяржава паслядоўна нарошчвае долю затрат кансалідаванага ВУП на ахову здароўя. Аляксандр Лукашэнка пацвердзіў прыхільнасць краіны да выканання Мэт устойлівага развіцця і, у прыватнасці, мэты "Забеспячэнне здаровага жыцця і садзейнічанне дабрабыту для ўсіх у любым узросце". Неад'емнай часткай палітыкі Беларусі ў сферы аховы здароўя з'яўляюцца меры, накіраваныя на прадухіленне распаўсюджвання ВІЧ/СНІДу. Прэзідэнт Беларусі адзначыў неабходнасць аб'яднання рэгіянальных і глабальных намаганняў у гэтым накірунку. Нагадаем, ААН высока ацаніла дасягненні Беларусі ў барацьбе з ВІЧ. У штаб-кватэры арганізацыі ў Нью-Ёрку пастаяннаму прадстаўніку нашай краіны Андрэю Дапкюнасу ўручана пасведчанне Сусветнай арганізацыі аховы здароўя. Яно фіксуе, што ў Беларусі афіцыйна пацверджана поўнае прадухіленне перадачы ВІЧ-інфекцыі ад маці да дзіцяці. Наша краіна стала першай і адзінай у Еўропе, якая атрымала такое пасведчанне.