Як растлумачыў ганаровы консул гэтай краіны Уладзімір Мікуліч, першым крокам на шляху стварэння такога цэнтра стануць курсы чэшскай мовы. Яны пачнуць працаваць з пачатку новага навучальнага года. Тэхнічнае забеспячэнне і частковае фінансаванне праекта гатова ўзяць на сябе адна чэшская кампанія, якая мае бізнэс на тэрыторыі Брэсцкай вобласці. Пад будучы цэнтр і моўныя курсы яна арганізуе пляцоўку, дзе могуць размясціцца офіс, навучальныя класы, выставачны павільён. Што тычыцца культурных праектаў пад эгідай ганаровага консульства, то яны працягнуцца. Адным са значных сумесных праектаў стане святкаванне ў Чэхіі і Беларусі пяцісотгадовага юбілею выдання Бібліі Францыска Скарыны.