Беларусь да 2030 года павінна ўвайсці ў топ-40 краін па ўзроўні развіцця чалавечага патэнцыялу. Такую задачу агучыў прэм'ер-міністр Міхаіл Мясніковіч падчас круглага стала, удзельнікі якога разглядалі праект Нацыянальнай стратэгіі ўстойлівага развіцця да 2030 года. У стратэгіі будзе ўлічвацца той факт, што са студзеня 2015 года Беларусь зажыве ва ўмовах новай эканамічнай рэальнасці (пачне функцыянаваць Еўразійскі эканамічны саюз). Паводле ўсіх прагнозаў, бліжэйшыя 15 гадоў сусветная эканоміка будзе развівацца ў вельмі цяжкіх умовах. Акрэсліваючы найбольш актуальныя пытанні, якія павінны быць адлюстраваны ў стратэгіі доўгатэрміновага развіцця краіны, прэм'ер, у прыватнасці, папрасіў удзяліць сур'ёзную ўвагу структуры айчыннай эканомікі. Асобную ўвагу кіраўнік урада ўдзяліў пытанням інавацыйнага развіцця.