На першым блоку БелАЭС выкананы пробны пуск турбіны

На першым блоку Беларускай АЭС выкананы пробны пуск турбіны, паведамілі БЕЛТА ў прэс-службе Міністэрства энергетыкі.

"Паспяхова ажыццёўлены так званы першы штуршок турбіны на магутнасці рэактара 35 працэнтаў. Турбіну пракруцілі на халастым ходу і паэтапна павялічылі колькасць абаротаў да праектных значэнняў - 3 тыс. абаротаў за мінуту", - паведамілі ў прэс-службе.

Пуск турбіны - адна з важных аперацый пры падрыхтоўцы энергаблока да пачатку выпрацоўкі электраэнергіі.

"Турбаагрэгат у адпаведнасці з праграмай выпрабаванняў выведзены на намінальныя абароты. Усе паказчыкі, уключаючы вібрацыйны стан, у норме, што дае нам магчымасць пачаць праграму выпрабаванняў турбіны на халастым хаду і генератара перад уключэннем у сетку", - пракаменціраваў віцэ-прэзідэнт АТ ІК "АБЭ", дырэктар праекта па ўзвядзенні Беларускай АЭС Віталь Палянін.

Графік пуску першага энергаблока Беларускай АЭС стартаваў 7 жніўня, калі ў корпус рэактара была загружана першая цеплавыдзяляльная зборка са свежым ядзерным палівам. 11 кастрычніка на этапе фізічнага пуску рэактар быў выведзены на мінімальна кантралюемы ўзровень магутнасці (менш за 1 працэнт ад намінальнай магутнасці). Усяго на этапе фізічнага пуску было выканана больш за 50 фізічных вымярэнняў, якія пацвердзілі адпаведнасць ядзерна-фізічных характарыстык рэактарнай устаноўкі праектным. 23 кастрычніка ДП "Беларуская АЭС" і АТ ІК "АБЭ" (інжынірынгавы дывізіён дзяржкарпарацыі "Расатам") атрымалі дазвол МНС Беларусі на выкананне работ па этапнай праграме энергетычнага пуску энергаблока нумар 1.