Нацыянальная кінастудыя "Беларусьфільм" пачала здымкі новай дакументальнай стужкі "Чырачка", прысвечанай унікальнаму абраду сустрэчы вясны, які захаваўся ў вёсцы Тонеж (Лельчыцкі раён, Гомельская вобласць). Мясцовыя жыхары зазываюць птушак чыркоў – вестуноў вясны. У святочны дзень выпякаецца печыва ў выглядзе маленькіх качачак па спецыяльным рэцэпце, упрыгожваецца ёлка і вырабляецца пудзіла зімы да веснавога новага года. Затым жыхары вёскі едуць на ўзгорак, каб паклікаць вясну і ачысціцца ад старой зімы, а па дарозе раздаюць суседзям "чырачак". Пра ўнікальны абрад рэжысёрам Валерыем Рыбаровым ў 1977 годзе зняты дакументальны фільм "Тонежскія бабы", які стаў этапным у творчасці вядомага беларускага кінематаграфіста. Аўтарам новай стужкі стала рэжысёр-дэбютант Марыя Курачава. Фільм можна будзе ўбачыць ужо восенню.