Савет Еўропы разлічвае, што Беларусь у будучым можа стаць членам СЕ, заявіў дырэктар і юрыдычны саветнік Дэпартамента прававых пытанняў і міжнароднага публічнага права СЕ Ёрг Палякевіч на канферэнцыі па прававых стандартах і сістэме пагадненняў і канвенцый Савета Еўропы ў Мінску. Прадстаўнік СЕ пазітыўна ацаніў факт далучэння Беларусі да некаторых дакументаў. У прыватнасці, ён сказаў, што краіна ўдзельнічае ў Канвенцыі аб прызнанні кваліфікацый, якія адносяцца да вышэйшай адукацыі ў Еўрапейскім рэгіёне. Эксперт падкрэсліў, што дакумент даў магчымасць Беларусі далучыцца да Балонскага працэсу. Акрамя таго, Ёрг Палякевіч звярнуў увагу, што Беларусь мае багатую юрыдычную гісторыю. У часы Вялікага Княства Літоўскага быў створаны Статут ВКЛ, які ў тым ліку стаў узорам заканатворчасці для іншых дзяржаў.