Старшыня Цэнтрвыбаркама Лідзія Ярмошына лічыць цалкам збалансаваным папярэдні даклад БДІПЧ АБСЕ па выбарах у парламент Беларусі, хоць ЦВК згодны не з усім. У прыватнасці гэта тычыцца прапановы АБСЕ ўскладніць працэдуру ўдзелу выбаршчыкаў у галасаванні. Сістэматызаваныя прапановы па паляпшэнні выбарчага заканадаўства будуць перададзены на разгляд прэзідэнту Беларусі пасля таго, як будзе атрымана канчатковая справаздача АБСЕ. У цэлым міжнародныя назіральнікі ацанілі арганізацыю парламенцкіх выбараў у Беларусі як эфектыўную. Беларусь прадэманстравала шэраг сігналаў гатоўнасці рэфармаваць выбарчае заканадаўства, канстатавалі назіральнікі. На пасяджэнні ЦВК зацверджаны вынікі выбараў у Палату прадстаўнікоў і зарэгістраваныя абраныя дэпутаты і члены Савета Рэспублікі. Першыя пасяджэнні палат парламента новага склікання адбудуцца 11 і 12 кастрычніка.