Місія БДІПЧ АБСЕ 31 ліпеня прыбудзе ў Беларусь для назірання за парламенцкімі выбарамі

   фото:     www.belta.by

      Місія БДІПЧ АБСЕ 31 ліпеня прыбудзе ў Беларусь для назірання за парламенцкімі выбарамі, паведаміла старшыня Цэнтрвыбаркама Лідзія Ярмошына. 2 жніўня ў Цэнтральнай камісіі чакаецца сустрэча з кіраўніцтвам місіі. Зараз для назірання за выбарамі акрэдытаваны 193 міжнародныя назіральнікі, у тым ліку, 142 - ад СНД, 51 - ад БДІПЧ АБСЕ. На месца ў Палаце прадстаўнікоў у сярэднім прэтэндуе больш за два чалавекі, - таксама паведаміла Лідзія Ярмошына. Вылучэнне кандыдатаў у дэпутаты праходзіць з 3 ліпеня па 1 жніўня. Кіраўнік ЦВК не выключае, што ў бліжэйшыя дні будзе паступаць вялікая колькасць дакументаў аб вылучэнні, бо набліжаецца крайні тэрмін іх падачы.
      Між тым, участковыя выбаркамы для парламенцкіх выбараў у Беларусі сфарміраваныя ў чатырох гарадах Расіі. Гэта Масква, Калінінград, Растоў-на-Доне і Санкт-Пецярбург. Грамадзяне Беларусі, якія пастаянна пражываюць або часова знаходзяцца на тэрыторыі суседняй краіны, могуць прагаласаваць як датэрмінова, так і ў асноўны дзень выбараў - 11 верасня. З сабой трэба мець дакументы, якія  пацвярджаюць асобу і грамадзянства.