МТЗ плануе ў 2021 годзе адкрыць зборачную вытворчасць у Каіры

Фота: belta.by

Мінскі трактарны завод плануе адкрыць зборачную вытворчасць у Каіры (Егіпет). Аб гэтым паведаміў генеральны дырэктар ААТ "МТЗ" Віталь Воўк на сустрэчы са старшынёй егіпецкай часткі беларуска-егіпецкага савета дзелавога супрацоўніцтва, генеральным дырэктарам кампаніі Egyptian International Pharmaceutical Industries Ахмедам Келані, паведамілі БЕЛТА ў прэс-службе МТЗ.

"Егіпецкі бок прапаноўваў некалькі пляцовак. Мы спыніліся на пляцоўцы ў Каіры, дзе можна сумясціць і вытворчасць, і фірменны гандаль. Пакуль усё падлічваем, працуем у аддаленым рэжыме. Але я ўпэўнены, што рух па праекце будзе, паколькі абодва бакі зацікаўлены ў супрацоўніцтве. Мы разлічваем, што зборка трактароў у Каіры пачнецца ў 2021 годзе", - адзначыў Віталь Воўк.

Што датычыцца гандлю, то экспарт МТЗ у Егіпет у студзені - лістападзе 2020 года павялічыўся на 40 працэнтаў у параўнанні з аналагічным перыядам мінулага года. "Вядома, хацелася б больш, але перашкодзіла пандэмія. У бліжэйшы час спадзяёмся выйсці на продаж мінімум 1 тыс. трактароў за год. Гэта без зборкі. Калі са зборкай, то да 5 тыс. і вышэй", - падкрэсліў гендырэктар.

У сваю чаргу Ахмед Келані выказаў зацікаўленасць у пашырэнні вектараў беларуска-егіпецкага ўзаемадзеяння. У прыватнасці, падчас цяперашняга візіту плануецца абмеркаваць магчымасць праектаў у фармацэўтычнай прамысловасці і па перапрацоўцы другасных матэрыяльных адходаў.