У нашай краіне створаны самыя камфортныя ўмовы для кітайскага бізнесу

Самыя камфортныя ўмовы для кітайскага бізнесу створаны ў Беларусі. Такое меркаванне на сустрэчы з намеснікам прэм'ер-міністра Беларусі Анатолем Тозікам выказала старшыня Камітэта па замежных справах Усекітайскага схода народных прадстаўнікоў Кітайскай Народнай Рэспублікі Фу Ін. Яна высока ацаніла развіццё беларуска-кітайскіх адносін і ўзровень увагі і падтрымкі, якія аказваюцца з боку беларускага ўрада кітайскім кампаніям пры рэалізацыі праектаў у Беларусі. Фу Ін выказала ўпэўненасць, што беларускія і кітайскія кампаніі сумеснымі намаганнямі змогуць адкрыць новы этап свайго развіцця. Для гэтага ёсць два фактары: фарміраванне АЭП і рэалізацыя праекта па стварэнні эканамічнай зоны Шаўковага шляху, дзе Беларусь - ключавое звяно. Галоўнымі перавагамі Беларусі для кітайскіх партнёраў з'яўляюцца ўнутраная палітычная стабільнасць і ўстойлівасць.