Беларусь і Украіна распрацавалі дарожную карту па стварэнні сумесных вытворчасцей сельскагаспадарчай тэхнікі.

       Беларусь і Украіна распрацавалі дарожную карту па стварэнні сумесных вытворчасцей сельскагаспадарчай тэхнікі. Пра гэта паведаміў першы намеснік прэм'ер-міністра Беларусі Уладзімір Сямашка па выніках сустрэчы дэлегацый дзвюх краін у Гомелі. Паводле слоў Уладзіміра Сямашкі, гэта дарожная карта ў дастатковай меры ўлічвае інтарэсы абодвух бакоў. Украіна мае намер амаль падвоіць вытворчасць збожжа і тым самым нарасціць свой экспарт. Беларусь жа гатова дапамагчы ёй перааснасціць машынна-трактарны парк. Размова ідзе аб стварэнні вытворчасцей беларускіх камбайнаў, трактароў, плугоў, іншых сельскагаспадарчых агрэгатаў. Пры гэтым лакалізацыя вытворчасцей павінна быць даволі глыбокай. На пасяджэнні абмяркоўваліся таксама фінансавыя інструменты, прымяненне якіх дало б магчымасць паскорыць працэсы вытворчай кааперацыі.