Глабальныя выклікі патрабуюць ад сусветнай супольнасці адзінства, заявіў кіраўнік беларускага МЗС.

        Глабальныя выклікі патрабуюць ад сусветнай супольнасці адзінства, заявіў кіраўнік беларускага МЗС з трыбуны Генеральнай асамблеі ААН. Уладзімір Макей прыняў удзел у агульнапалітычнай дыскусіі. Дыпламат расказаў аб падыходах Беларусі да вырашэння найбольш вострых міжнародных праблем - ад глабалізацыі і гандлю людзьмі да змянення клімату і рэфармавання ААН. Уладзімір Макей адзначыў, што большасці дзяржаў планеты працягваюць навязваць чужыя каштоўнасці, а таксама палітычныя і эканамічныя мадэлі. На думку міністра, галоўная мэта будучага парадку дня ААН у галіне развіцця - больш справядлівы працэс глабалізацыі. Раней Уладзімір Макей правёў шэраг двухбаковых сустрэч з калегамі з Турцыі, Нікарагуа, Сірыі. Таксама кіраўнік беларускага МЗС прыняў удзел у нефармальным мерапрыемстве высокага ўзроўню, прысвечанаму абароне дзяцей. Яно было арганізавана сумесна з шэрагам дзяржаў і Дзіцячым фондам ААН - ЮНІСЕФ. Уладзімір Макей пазнаёміў удзельнікаў сустрэчы з дасягненнямі Беларусі ў галіне адукацыі, аховы здароўя і сацыяльнай падтрымкі сем'яў з дзецьмі.