Сталі вядомы падрабязнасці злоўжыванняў супрацоўнікаў сістэмы ААН у Беларусі

Фота: belta.by

Сталі вядомы падрабязнасці злоўжыванняў супрацоўнікаў сістэмы ААН у Беларусі - нямэтавага выкарыстання фінансавых сродкаў персаналам прадстаўніцтва ААН, аб чым раней у інтэрв'ю журналістам згадваў міністр замежных спраў Беларусі Уладзімір Макей. Дэталі апублікаваны на сайце Пастаяннага прадстаўніцтва Рэспублікі Беларусь пры аддзяленні ААН і іншых міжнародных арганізацыях у Жэневе, паведамляе БЕЛТА.

У адпаведнасці з рэзалюцыяй 12/2 Савета ААН па правах чалавека (СПЧ) штогод выпускаецца даклад ад імя генеральнага сакратара ААН "Супрацоўніцтва з ААН, яе прадстаўнікамі і механізмамі ў галіне правоў чалавека". "У даклад (A/HRC/48/28), падрыхтаваны да 48-й сесіі СПЧ (13 верасня - 8 кастрычніка бягучага года), уключана недакладная інфармацыя аб Сяргею Драздоўскім, які ўзначальваў беларускую няўрадавую ўстанову "Офіс па правах людзей з інваліднасцю", на што сакратарыяту ААН было ўказана яшчэ на этапе падрыхтоўкі праекта даклада, - адзначаецца ў паведамленні беларускага пастаяннага прадстаўніцтва. - ААН задоўга да складання даклада A/HRC/48/28 валодала прадастаўленай Рэспублікай Беларусь дэталёвай інфармацыяй аб прычыных пачатку крымінальнага расследавання ў адносінах да Сяргея Драздоўскага і была добра інфармавана аб тым, што Сяргей Драздоўскі стаў "ахвярай" недапушчальнай, непрафесійнай і палітычна матываванай дзейнасці супрацоўнікаў прадстаўніцтва ААН у Рэспубліцы Беларусь".

Як сцвярджаецца ў распаўсюджаным паведамленні, назначаны Упраўленнем Вярхоўнага камісара ААН па правах чалавека ў офіс Пастаяннага каардынатара ААН у Рэспубліцы Беларусь саветнік па правах чалавека ініцыяваў нямэтавае выкарыстанне фінансавых сродкаў УВКПЧ, якія прызначаліся для аказання юрыдычнай дапамогі асобам з інваліднасцю або ахвярам дамашняга насілля.

У жніўні 2020 года, пасля арганізаваных звонку масавых беспарадкаў у Беларусі, якія адбыліся пасля аб'яўлення вынікаў выбарчай кампаніі, па ініцыятыве і пры далейшай падтрымцы чыноўніка ААН двума супрацоўнікамі офіса ААН у Беларусі пры поўным усведамленні імі неправамернасці сваіх дзеянняў была распрацавана і рэалізавана незаконная схема аплаты паслуг адвакатаў беларускім грамадзянам, якія не з'яўляюцца ні асобамі з абмежаванымі магчымасцямі, ні ахвярамі дамашняга насілля. Гэтыя грамадзяне ўдзельнічалі ў процізаконных пратэсных акцыях, накіраваных на падрыў дзяржаўнасці і звяржэнне дзеючай улады. У выніку былі прафінансаваны адвакаты для абароны 23 грамадзян.

"Афармленне плацежных дакументаў ажыццяўлялася тайна, у абход афіцыйна ўзгодненай дзейнасці, праз уключанага ў такую проціпраўную дзейнасць з яго ўсвядомленага ведама Сяргея Драздоўскага, дырэктара "Офіса па правах людзей з інваліднасцю", і пры непасрэдным удзеле юрыста гэтай установы. Такім чынам, беларускія грамадзяне Сяргей Драздоўскі і юрыст узначальваемай ім установы з падачы і пры ўдзеле шэрага супрацоўнікаў прадстаўніцтва ААН у Беларусі правялі фінансавую махінацыю са сродкамі ААН, выдзеленымі для дзяржавы на аказанне дапамогі інвалідам і ахвярам дамашняга насілля, што з'яўляецца крымінальна каральным дзеяннем", - адзначаюць у пастаянным прадстаўніцтве.

Сяргею Драздоўскаму і яго супрацоўніку прад'яўлены абвінавачанні ва ўчыненні злачынства, прадугледжанага ч.2 арт.209 Крымінальнага кодэкса Беларусі (махлярства, учыненае паўторна або групай асоб). Да іх была прыменена мера стрымання, звязаная з абмежаваннем волі. Пры гэтым Сяргей Драздоўскі з улікам яго інваліднасці знаходзіўся пад дамашнім арыштам. З 30 ліпеня 2021 года ў адносінах да гэтых грамадзян мера стрымання зменена, яны знаходзяцца на волі. "Адпаведна сцверджанні аб жорсткім абыходжанні ў адносінах да Сяргея Драздоўскага з'яўляюцца такой жа адкрытай хлуснёй, як і ўся іншая інфармацыя, прадстаўленая ў дакладзе A/HRC/48/28", - робяць выснову беларускія дыпламаты.

Адзначаецца, што Беларусь як добрасумленны партнёр не агучвала публічна факт злоўжывання фінансамі з боку асобных супрацоўнікаў ААН, нягледзячы на тое, што выяўленыя факты нанеслі сур'ёзны ўрон даверным і ўстойлівым раней узаемаадносінам Беларусі з ААН. "Толькі жаданнем дагадзіць заходнім донарам, якія разгарнулі агрэсіўную антыбеларускую кампанію ў ААН, можна растлумачыць уключэнне ў даклад A/HRC/48/28 інфармацыі аб Сяргею Драздоўскім як аб асобе, якая праследуецца за супрацоўніцтва з ААН, - падкрэсліваецца ў паведамленні. - Вырашыўшы зарабіць кар'ерныя ачкі на "беларускай тэме", асобныя супрацоўнікі ААН скажаюць факты і ўводзяць у зман сусветную супольнасць, верагодна, разлічваючы на тое, што недапушчальныя рэчы, якія няславяць ААН, не выявяцца.

Пры гэтым факты, падкрэсліваюць дыпламаты, сведчаць самі за сябе: міжнародны чыноўнік ААН, які выконваў функцыі саветніка па правах чалавека ў прадстаўніцтве ААН у Беларусі, праявіў палітычную перадузятасць, справакаваў парушэнне нацыянальнага заканадаўства грамадзянамі Беларусі, тым самым груба парушыў прынцыпы паводзін персаналу ААН, замацаваныя ў палажэнні аб персанале ААН. Аднак гэта ніяк не паўплывала на яго кар'еру. У далейшым ён быў працаўладкаваны ў сістэме УВКПЧ.

У пастаянным прадстаўніцтве нагадалі, што пункты 1.4, 1.5 і 1.8 палажэння аб персанале Арганізацыі Аб'яднаных Нацый, зацверджанага рэзалюцыяй ГА ААН 590 (VI) ад 2 лютага 1952 года, прадугледжваюць, што супрацоўнікі ААН не могуць займацца дзейнасцю, несумяшчальнай з належным выкананнем іх абавязкаў, павінны ўстрымлівацца ад усіх дзеянняў, якія могуць неспрыяльна паўплываць на іх статус, павінны захоўваць крайнюю стрыманасць ва ўсіх пытаннях, што датычацца іх службовых абавязкаў. Пры гэтым імунітэты і прывілеі, прысвоеныя Арганізацыі Аб'яднаных Нацый у выніку артыкула 105 статута, не могуць служыць апраўданнем для тых супрацоўнікаў, якія карыстаюцца імі для ўхілення ад выканання сваіх асабістых абавязацельстваў або невыканання законаў і паліцэйскіх правіл дзяржавы знаходжання.

"На жаль, сёння сакратарыят ААН штампуе даклады, якія поўнасцю адпавядаюць палітычным задачам Захаду, нягледзячы на пазіцыю іншых дзяржаў, ва ўрон рэальным фактам і нават уласнаму іміджу. Тым самым сакратарыят ААН становіцца правадніком перадузятага, аднабокага і раз'яднальнага парадку дня. Нельга дапускаць расколу ў ААН. Падзел дзяржаў з падачы калектыўнага Захаду на "добрых" і "дрэнных" небяспечны гібеллю Арганізацыі і поўным дэмантажом шматбаковай дыпламатыі", - рэзюмавалі ў пастаянным прадстаўніцтве.