Прэзідэнт Беларусі патрабуе ад вучоных не "казку", а патрэбны рэзультат у забеспячэнні бяспекі дзяржавы

Фота: belta.by

Ад вучоных у пытаннях забеспячэння бяспекі дзяржавы патрэбны канкрэтны рэзультат, а не "казкі" і абяцанні зрабіць нешта патрэбнае ў перспектыве. Аб гэтым Прэзідэнт Беларусі Аляксандр Лукашэнка заявіў у час рабочай паездкі ў Мінскую вобласць пры наведванні выпрабавальнага палігона ДНУ "Інстытут парашковай металургіі імя акадэміка А.У.Романа", перадае карэспандэнт БЕЛТА.

Кіраўніку дзяржавы далажылі аб перспектыўных распрацоўках НАН Беларусі ў інтарэсах умацавання тэхналагічнага суверэнітэту. У гэтым напрамку беларускія вучоныя працуюць у тым ліку ў інтарэсах грамадзянскага сектара. Напрыклад, вырабляюць прамысловую ўзрыўчатку, якая вельмі запатрабавана ў геолагаразведцы, пры распрацоўцы кар'ераў.

У ваеннай сферы адна з актуальных цяпер задач, як сказаў Аляксандр Лукашэнка, - гэта "абнуліць беспілотнікі". Гэта значыць, распрацаваць такія сродкі, якія дадуць магчымасць гарантавана і эфектыўна з імі змагацца. Тым больш у Беларусі ёсць навуковыя школы, якія працуюць у гэтай сферы. "Патрэбны сродак барацьбы з гэтымі беспілотнікамі. Гэта ваша справа, як вы будзеце вырашаць пытанне. Але калі вы разумныя, як мы выхваляемся, баяздольныя, перадавыя, з характарам, ну дык зрабіце. Абнуліце гэтыя беспілотнікі. Не трэба гонку арганізоўваць, хто лепш беспілотнік зробіць. Так, патрэбны добры беспілотнік, нікуды не дзенешся. Але галоўнае - навучыцца змагацца з беспілотнікамі", - заявіў Прэзідэнт.

Аляксандр Лукашэнка падкрэсліў, што калі па тым ці іншым запатрабаваным напрамку будзе рэзультат, то і ён асабіста, і дзяржава ў цэлым заўсёды акажуць неабходную падтрымку: "Зрабі і прыходзь, як я часта гавару, прасі, што захочаш". Ён прывёў нядаўні прыклад такога падыходу, калі жанчына, якая нарадзіла трайнят, папрасіла кватэру, - раней Аляксандр Лукашэнка ў адной са сваіх заяў прапанаваў такім маці прасіць у яго ўсё, што неабходна. "Папрасіла кватэру. Далі", - адзначыў ён.

"Патрэбны рэзультат, - патрабуе ад вучоных кіраўнік дзяржавы. - Пры падрыхтоўцы да гэтай паездкі я падумаў аб тым, што Уладзімір Сцяпанавіч (старшыня прэзідыума НАН Уладзімір Каранік. - Заўвага БЕЛТА) упершыню не толькі мне, але і народу даложыць аб сваіх поспехах у забеспячэнні бяспекі дзяржавы. Гэта не павінна быць чарговай казкай, што мы заўтра нешта зробім".

Распрацоўка новых сродкаў барацьбы з беспілотнікамі і ўдасканаленне саміх беспілотнікаў - гэта важны, але не адзіны напрамак, па якім дзяржава чакае сур'ёзных рэзультатаў ад навуковай сферы. Безумоўна, усе гэтыя работы патрабуюць сур'ёзнага фінансавання. "Гэта істотныя дзяржаўныя ўкладанні. Яны даюць той рэзультат, які могуць даць, які патрэбны і ваенным, і краіне? Яны сёння зрабілі тое, што павінны зрабіць або заўтра гэта нам дадуць?" - такое прынцыповае пытанне Аляксандр Лукашэнка паставіў перад удзельнікамі мерапрыемства.

Віцэ-прэм'ер Віктар Каранкевіч і намеснік кіраўніка Адміністрацыі Прэзідэнта Павел Муравейка далажылі, што задачы, якія ставяцца перад вучонымі, вырашаюцца. Рэзультат у тым ліку бачны ў паказчыках экспарту, калі тыя ці іншыя вырабы запатрабаваны ў тым ліку ў замежных пакупнікоў. Але Прэзідэнт патрабуе, каб аддача была максімальная і з рэзультатам па ключавых напрамках не ў аддаленай перспектыве, а ў сціслыя тэрміны.

"Каб мы нарэзалі задачу: ідзі, вырашай. І кожныя паўгода кантраляваць, - сказаў кіраўнік дзяржавы. - Мужыкі, я хачу, каб вы разумелі: вось гэтыя размовы агульныя нікому не патрэбны. Ваенным мы задачы ставім сур'ёзныя, надзвычайныя. Трэба імгненна вырашаць тыя задачы, якія трэба вырашыць. Іншых задач не будзе. Нам не патрэбны вучоныя, якія ходзяць і казкі расказваюць".

"Перспектыўныя задачы ёсць. Яны закладзены. Стаяць жорсткія тэрміны - 2027-2028 гады. Гэта перспектыва, якую яны павінны выканаць", - запэўніў Павел Муравейка.

Паводле яго слоў, многія распрацоўкі вучоных у сферы нацыянальнай бяспекі ўжо ўкаранёны на практыцы, праведзены неабходныя выпрабаванні, па шэрагу напрамкаў пачата серыйная вытворчасць. Усё гэта робіцца ў цесным кантакце з ваеннымі, каб улічыць іх запатрабаванні.

Кіраўніку дзяржавы прадэманстравалі навуковыя распрацоўкі грамадзянскага і абароннага прызначэння, у тым ліку рэактыўныя снарады, боепрыпасы да БПЛА і ўзрывальнікі да іх, сумесевае ракетнае цвёрдае паліва. Аляксандр Лукашэнка азнаёміўся з тэхналогіяй запраўкі рэактыўных снарадаў сумесевым ракетным палівам і паназіраў за выпрабаваннем ракетнай рухальнай устаноўкі.

Прэзідэнт таксама азнаёміўся з беспілотнымі лятальнымі апаратамі. Айчынныя вучоныя за апошні час істотна рушылі наперад у гэтым напрамку, але Аляксандр Лукашэнка даручыў яшчэ больш іх актывізаваць. "Трэба падтрымліваць. Калі мы разумеем, што нам неабходны беспілотнікі апошняга пакалення, мы павінны ведаць, якія нам патрэбны. Вызначыць, каго мы будзем падтрымліваць. І няхай працуюць. Жорсткія тэрміны", - даручыў беларускі лідар.

Яшчэ адна распрацоўка беларускіх вучоных - айчынны порах і іншыя выбуховыя рэчывы, неабходныя ў рабоце спецпадраздзяленняў. Кіраўніку дзяржавы даложана аб далейшых перспектывах па гэтым напрамку, ён азнаёміўся з выпрабаваннем высокаэнергетычных выбуховых рэчываў.

Прадэманстравалі Прэзідэнту і розную аўтамабільную тэхніку ў абароненым выкананні, сродкі бронеаховы і спецыяльнай амуніцыі. Задачы ў гэтай сферы кіраўніком дзяржавы ставіліся даўно. Цяпер у Беларусі ўжо вырабляюць дастатковую колькасць бронекамізэлек, якія па сваіх уласцівасцях як мінімум не горшыя за замежныя аналагі. "Я ў тэме, сам узнімаў яе. Бронекамізэлькі нам патрэбны былі вельмі добрыя, эфектыўныя", - заўважыў беларускі лідар.

У час наведвання выпрабавальнага палігона Аляксандр Лукашэнка азнаёміўся са сродкамі выяўлення, суправаджэння і знішчэння БПЛА, распрацоўкамі ЗАТ "Авіяцыйныя тэхналогіі і комплексы" і УП "Навукова-тэхнічны цэнтр "ЛЭМТ". Асабліва кіраўніка дзяржавы зацікавіў двухмесны аўтажыр "Філін". Апарат надзейны, здольны забяспечыць бяспечную пасадку нават пры паломцы рухавіка. Можа выкарыстоўвацца ў разведцы, назіранні, для мэт транспарціроўкі і выканання спецыяльных задач. Але гэта далёка не поўны спектр магчымасцей. Айчынныя спецыялісты змаглі прыстасаваць гэты аўтажыр і пад задачы для сельскай гаспадаркі пры апрацоўцы палёў. Але перш чым весці гаворку пра маштабаванне вытворчасці, варта ўсё дасканала прааналізаваць, арыентуе Аляксандр Лукашэнка.

У якасці падарунка кіраўніку дзяржавы паднеслі цалкам айчынны цеплавізійны прыцэл, які выкарыстоўваецца для аснашчэння стралковай зброі.

На заканчэнне Прэзідэнт яшчэ раз паабяцаў вучоным і распрацоўшчыкам падтрымку, але пад канкрэтны рэзультат. А яшчэ падкрэсліў, што трэба эфектыўна выкарыстоўваць айчынныя магчымасці, асабліва ў тых сферах, дзе напрацаваны добрыя кампетэнцыі: "Нам трэба рабіць тое, што мы можам рабіць, менш затратна. Фінансаў жа такіх няма, каб кідацца на ўсё".