Прэзідэнт Беларусі на саміце СНД абазначыў стратэгічныя напрамкі ў дзейнасці Садружнасці

Фота: belta.by

Прэзідэнт Беларусі Аляксандр Лукашэнка на пасяджэнні Савета кіраўнікоў дзяржаў СНД у вузкім фармаце назваў стратэгічныя напрамкі ў дзейнасці Садружнасці Незалежных Дзяржаў, перадае карэспандэнт БЕЛТА.

Кампаненты нацбяспекі кожнай з дзяржаў СНД і Садружнасці ў цэлым

"Процідзеянне тэрарызму, умацаванне надзейнасці граніц, барацьба з транснацыянальнай злачыннасцю - гэта даўно перастала быць задачамі асобных ведамстваў, стаўшы кампанентамі нацыянальнай бяспекі кожнай з дзяржаў СНД", - заявіў Аляксандр Лукашэнка. Паводле слоў Прэзідэнта, шырокі парадак дня пасяджэння - пацвярджэнне таго, што сучасныя пагрозы датычацца ўсіх.

"Мы з'яўляемся сведкамі і ўдзельнікамі тэктанічных геапалітычных працэсаў. Для некага яны азначаюць цяжкае і крыўднае прывядзенне амбіцый у адпаведнасць з рэальнымі магчымасцямі. Для нашай жа Еўразіі яны - неабходны, хоць і няпросты этап на шляху да росту глабальнай ролі і ўмацавання статусу аднаго з важнейшых палітыка-эканамічных цэнтраў шматпалярнага свету", - падкрэсліў беларускі лідар.

Ён выказаў упэўненасць, што агульныя выклікі патрабуюць максімальнай скаардынаванасці і выкарыстання ўсяго патэнцыялу СНД. "Таму наша сённяшняя мэта - не толькі канстатацыя рызык і аналіз магчымасцей, а выпрацоўка канкрэтных, практычна рэалізуемых механізмаў узаемадзеяння", - дадаў кіраўнік дзяржавы.

Забеспячэнне бяспекі і захаванне міру як абсалютны прыярытэт

"Хачу акцэнтаваць увагу на некалькіх ключавых стратэгічных напрамках у дзейнасці нашай арганізацыі. Першае: абсалютны прыярытэт - гэта забеспячэнне бяспекі і захаванне міру на прасторы Садружнасці. Мы не павінны дапусціць, каб дзяржавы СНД аказаліся ўцягнутыя ў небяспечныя авантуры, якія пагражаюць як нашаму рэгіёну, так і ўсяму чалавецтву", - заявіў кіраўнік дзяржавы.

Аляксандр Лукашэнка адзначыў, што галіновыя саветы СНД, якія дзейнічаюць у сферы бяспекі, аператыўна рэагуюць на ўзнікаючыя выклікі і пагрозы. "З іх падачы мы сёння прымем вельмі важныя рашэнні і дакументы: праграмы супрацоўніцтва ў сферы процідзеяння тэрарызму і экстрэмізму на 2026-2028 гады, у сферы ўмацавання пагранічнай бяспекі на знешніх граніцах на 2026-2030 гады, Канцэпцыю ваеннага супрацоўніцтва да 2030 года", - дадаў ён.

"Мы чакаем актыўнага ўдзелу вашых прадстаўнікоў у маючай адбыцца ў канцы кастрычніка трэцяй Мінскай канферэнцыі высокага ўзроўню па еўразійскай бяспецы", - рэзюмаваў Прэзідэнт.

Неабходнасць нарошчваць запас трываласці эканомік дзяржаў Садружнасці

"Другое. У аснове многіх, калі не ўсіх, сучасных канфліктаў - эканоміка і канкурэнцыя. Каб выстаяць у гэтай барацьбе, забяспечыць устойлівае развіццё і павышэнне дабрабыту ўсіх нашых краін, трэба ўмацоўваць эканамічны фундамент і паглыбляць гандлёвае і інвестыцыйнае супрацоўніцтва, вытворчую кааперацыю", - упэўнены Аляксандр Лукашэнка.

"Давайце не страцім тое, што напрацавана пакаленнямі нашых людзей. Давайце бачыць партнёраў у першую чаргу адзін у адным, максімальна пашыраць узаемадзеянне без усялякіх закрытых тэм", - заклікаў беларускі лідар.

Кіраўнік дзяржавы адзначыў, што, нягледзячы на "шалёны санкцыйны націск Захаду", спробы забіць клін паміж краінамі СНД пагрозамі другасных санкцый, у Садружнасці ў бягучым годзе захоўваюцца станоўчыя тэмпы эканамічнага росту - 2,2 працэнта за студзень - ліпень.

Тым не менш, падкрэсліў Аляксандр Лукашэнка, трэба нарошчваць запас трываласці эканомік. Ён нагадаў свой тэзіс аб тым, што галоўнае - гэта эканоміка. "Мы так ці інакш упіраемся ў пытанне нашай сумеснай дзейнасці ў эканоміцы ў рамках (былога. - Заўвага БЕЛТА) Савецкага Саюза, агульнага рынку. Размова тут не ідзе аб вяртанні да таго парадку, які быў у Савецкім Саюзе. Але агульны рынак жа быў глабальны, вялізны. Можа, нам адкінуць усялякія незразумелыя роздумы-разважанні і заняцца нарэшце пытаннямі эканомікі, улічваючы тое, што патрэбна кожнаму з нас?" - прапанаваў ён.

Аляксандр Лукашэнка выказаў упэўненасць, што ў выпадку выпрацоўкі агульнай стратэгіі ўдасца аднавіць эканамічную прастору з улікам пажаданняў усіх дзяржаў і выбудаваць скаардынаваныя дзеянні на міжнароднай арэне ў галіне гандлёва-эканамічнага супрацоўніцтва. Пры гэтым, падкрэсліў ён, ні ў якім разе не трэба закранаць амбіцыі кожнай з дзяржаў СНД. "Але гэта трэба пачынаць рабіць цяпер", - заявіў беларускі лідар.

Акрамя таго, Прэзідэнт вітаў прыняцце на пасяджэнні дэкларацыі аб супрацоўніцтве ў сферы забеспячэння рэгіянальнай энергетычнай бяспекі. Ён таксама нагадаў, што 29 верасня ў Мінску зацверджаны план мерапрыемстваў па рэалізацыі стратэгіі эканамічнага развіцця СНД да 2030 года.

Умацаванне аўтарытэту СНД на міжнароднай арэне

Трэцім напрамкам у дзейнасці Садружнасці Аляксандр Лукашэнка назваў умацаванне аўтарытэту і пазіцыянаванне СНД на міжнароднай арэне. "Актывізацыя інтэграцыйнага ўзаемадзеяння дзяржаў Еўразіі і рост цікавасці да супрацоўніцтва з нашымі агульнымі структурамі з боку трэціх краін набываюць характар устойлівай тэндэнцыі", - заявіў Прэзідэнт. 

"Паглядзіце, як у гэтым плане рушыла наперад Шанхайская арганізацыя супрацоўніцтва, якія вынікі ёсць у ЕАЭС, - падкрэсліў ён. - Садружнасці Незалежных Дзяржаў таксама неабходна ўмацоўваць узаемадзеянне з краінамі і арганізацыямі-аднадумцамі для пашырэння ўзгодненага міжнароднага парадку дня, адстойвання нашых падыходаў і каштоўнасцей". 

У сувязі з гэтым, лічыць беларускі лідар, агульным інтарэсам адпавядае надзяленне ШАС статусам наглядальніка ў Садружнасці. Акрамя таго, Прэзідэнт Беларусі цалкам падтрымаў ініцыятыву Прэзідэнта Казахстана аб заснаванні фармату "СНД плюс".

Захаванне традыцый міжкультурнай камунікацыі і гуманітарнае супрацоўніцтва

Прэзідэнт таксама выказаўся аб неабходнасці захавання традыцый міжкультурнай камунікацыі і гуманітарным супрацоўніцтве - чацвёртым стратэгічным напрамку. Ён выказаў меркаванне, што ў бягучым годзе ўдалося дастойна правесці мерапрыемствы, прысвечаныя 80-годдзю Перамогі над фашызмам, у тым ліку заснаваўшы ганаровае званне СНД "Горад працоўнай славы. 1941-1945 гады". "У Беларусі цяпер яго з гонарам носяць Баранавічы і Орша", - дадаў ён.

Прэзідэнт нагадаў, што ў 2026 годзе споўніцца 40 гадоў з дня адной з найбуйнейшых тэхнагенных катастроф у гісторыі чалавецтва - аварыі на Чарнобыльскай АЭС. Кіраўнік дзяржавы звярнуў увагу, што гэтай тэме прысвечаны заява ў рамках СНД, а таксама вылучаная на 80-й сесіі Генеральнай Асамблеі ААН рэзалюцыя па тэме Чарнобыля.

На заканчэнне кіраўнік дзяржавы заявіў, што Беларусь высока ацэньвае старшынства Таджыкістана ў органах СНД у 2025 годзе. Карыстаючыся выпадкам, Аляксандр Лукашэнка выказаў удзячнасць Прэзідэнту Таджыкістана Эмамалі Рахмону за гасціннасць, а Выканкаму СНД - за высокі ўзровень падрыхтоўкі цяперашніх мерапрыемстваў.

Беларускі лідар павіншаваў Прэзідэнта Туркменістана Сердара Бердымухамедава з прыняццем Ашхабадам старшынства ў СНД. Аляксандр Лукашэнка запэўніў Сердара Бердымухамедава, што Туркменістан можа разлічваць на садзейнічанне Беларусі.