Дзяржпагранкамітэт Беларусі папярэджвае грамадзян аб узмацненні мер бяспекі на межах з краінамі ЕС, паведаміў прэс-сакратар ведамства Аляксандр Цішчанка. З-за тэракту ў Парыжы літоўскія пагранічнікі перайшлі на ўзмоцнены варыянт нясення службы, яны будуць праводзіць дадатковыя праверкі ў дачыненні да грамадзян, якія перасякаюць мяжу. Таму час праходжання мяжы ў беларускіх грамадзян будзе даўжэйшым. Паводле яго слоў, у хуткім часе ўзмоцняць дагляд і пагранічнікі Польшчы. Беларускія пагранічнікі таксама пераходзяць на ўзмоцнены варыянт нясення службы, гэта стандартныя меры для павышэння ўзроўню бяспекі, адзначыў прадстаўнік ведамства.