Грамадская арганізацыя "Ахова птушак Бацькаўшчыны" прапануе людзям выйсці на сувязь з прыродай у літаральным сэнсе. Каб пачуць спевы птушак, дастаткова проста патэлефанаваць па спецыяльных нумарах, якія можна знайсці на сайце. Першыя ўласныя тэлефонныя нумары з'явіліся ў малінаўкі, шчыгла, салаўя, снегіра, чорнага дразда. Іх выбралі не выпадкова. Гэта самыя распаўсюджаныя ў Беларусі і самыя вядомыя птушкі, якіх можна ўбачыць у парках, а часам і прама з акна кватэры. Многія чулі гэтыя галасы раней, але не ўсе ведалі, каму яны належаць. Перш чым вы пачуеце голас птушкі па тэлефоне, вас будуць вітаць "птушыныя сакратары". У іх ролі выступілі акцёры Купалаўскага тэатра.