Выстава беларускага іканапісу адлюстроўвае асаблівасці нацыянальнага мастацтва і значны ўклад Беларусі ў сусветную скарбніцу культурных каштоўнасцяў.

        Выстава беларускага іканапісу, якая праходзіць у Будапешце, адлюстроўвае асаблівасці нацыянальнага мастацтва і значны ўклад Беларусі ў сусветную скарбніцу культурных каштоўнасцяў. Такі пункт гледжання выказалі карэспандэнту БЕЛТА у пасольстве Беларусі ў Венгрыі. Экспазіцыя "Іканапіс Беларусі XVII - XVIII стагоддзяў " адкрылася 29 красавіка ў Гістарычным музеі Будапешта. На ёй прадстаўлена 30 унікальных помнікаў беларускага іканапісу. На цырымоніі прэзентацыі выступілі намеснік міністра замежных спраў Беларусі Алена Купчына, Надзвычайны і Паўнамоцны Пасол Беларусі ў Венгрыі Аляксандр Хайноўскі, генеральны дырэктар Нацыянальнага мастацкага музея Беларусі Уладзімір Пракапцоў. Выступоўцы адзначылі, што на працягу стагоддзяў менавіта абраз і прыналежнасць да хрысціянскай веры з'яўляліся кансалідуючым пачаткам, які падтрымлівае імкненне беларускага народа адстаяць сваю нацыянальную самасвядомасць, мову, культуру насуперак гістарычным і палітычным фактарам. У Гістарычным музеі Будапешта гэтая выстава будзе доўжыцца да сярэдзіны чэрвеня, а затым да пачатку кастрычніка будзе экспанавацца ў венгерскіх рэгіянальных музеях у гарадах Сольнак і Кечкемет.